7 Алтынньы 07.10
  • -4°
  • $ 60,25
  • 58,24

Анна ПОПОВА: “Былааммытын куруутун толоробут”

Сылын аайы от ыйын иккис өрөбүлэ почта үлэһиттэрин күнүнэн биллэр. Быйыл ити күҥҥэ сөп түбэһиннэрэн, Майатааҕы почтамт киниэхэ киирэр улуустары ыҥыртаан улахан ыһыаҕы тэрийдэ. Бу от ыйын 2 күнүгэр буолбут ыһыахха сыл аҥаардааҕы үлэ уонна 2022 сыл иккис аҥаарыгар сурутуу түмүгүн таһаардылар, кыайыылаахтары быһаардылар. Биһиги улууспут почтатын тэрилтэтэ Чурапчыттан көһөн, бөдөҥсүтүүгэ хабыллан, билигин Майатааҕы почтамҥа бас бэринэр отделение буолбута. Билигин почта үлэтин 2006 сылтан Даайа Амматын отделениетыгар начальнигынан сазалаабыт, кэлин Ытык Күөлгэ начальник солбуйааччытынан үлэлээбит улахан уопуттаах Попова Анна Семеновна салайар. Бүгүҥҥү почта отделениета хайдах-туох дьаһанан, үлэлээн-хамсаан олорорун билээри кинини кытта кэпсэттибит.

— Бастаан ааспыт да буоллар, идэлээх бырааһынньыккытынан, ситиһиигитинэн эҕэрдэлээн туран, ыһыах туһунан кэпсии түс эрэ… Туох ситиһиилэннигит?

— Томпо, Чурапчы, Уус Алдан, Таатта, Уус Майа, Амма, Мэҥэ Хаҥалас почталарын үлэһиттэрин холбоһуктаах ыһыахтара ааспыт өрөбүлгэ Майа алааһыгар Ураһалаахха буолла. Бастатан туран үлэбит көрдөрүүлэринэн 2022 сыл иккис аҥаарыгар сурутууну үчүгэйдик ыытан, «Саха сирэ», «Якутия» хаһыаттары сурутууга 47 экземпляры сурутан Ытык Күөллээҕи отделениебыт өрөспүүбүлүкэҕэ бастаан, сертификат туттубут, 30 тыһ. бириэмийэлэннибит, биһиги кэннибититтэн кэлэр Дьокуускай почтама 39 эрэ экземпляр. Билигин урукку курдук нэһилиэнньэ ахсаанынан бөлөхтөргө араарбаттар, барыта биир кэлим, бу конкурска улахан почта отделениеларын кытта тэҥҥэ киирсэн, биһиги Томторбут 10 бастыҥ иһигэр киирбититтэн киэн туттабыт. Сурутуу таһыма олус күүскэ түстэ. Сүрүн биричиинэтэ ааҕааччы аҕыйаата, эдэр дьон сонуну социальнай ситимнэринэн ааҕар, ол гынан кумааҕы хаһыат сүтүө дии санаабаппын. Уура сылдьан ааҕар, буола турар событиелары ырытар, тэҥниир дьон син биир бааллар буоллаҕа. Онон баҕар кэлин өссө сайдыан, кэҥиэн сөп. Оттон ыһыах оонньууларын, культурнай тэрээһин туһунан кэпсээтэххэ, саха таҥаһын көрүүтүгэр биһиги коллектив эр дьон да, дьахтар да таҥаһыгар бастаатыбыт. Ол курдук саамай уһуннук үлэлээбит почтальоммут Попов Николай Васильевич кэргэнэ Розаида Романовна — биһиги ытыктыыр ветераммыт, почтовик идэтигэр уһуйбут наставнигым этэрбэһиттэн куругар, кыыннаах быһаҕар тиийэ саха көстүүмүн толору комплегын тигэн кэтэрдэн, бастакы миэстэни эрэллээхтик ылла. Дьахталларга Чөркөөхтөн удьуордаан почтаҕа таһаарыылаахтык үлэлии сылдьар Афанасьева Евдокия Ивановна — биһиги ытыктыыр ветераммыт, 25 сыл начальниктаабыт Аввакумова Татьяна Николаевна кыыһа — кыһыҥҥы, сайыҥҥы саха дьахтарын толору комплегынан кыттан эмиэ бастаата.

Мас тардыһыы-тыгар дьахталларга биһиги ортобутугар улуус сүүмэрдэммит хамаандатыгар киирсэн республикаҕа миэстэлэһэр, утумнаахтык спордунан дьарыктанар үлэһиппит Чымынаайыттан Галина Варламова бастыаҕын бастаата. Көрдөөх-нардаах, ыһыылаах-хаһыылаах хамаанданан киирсиигэ “Көрдөөх стартка” эмиэ атын улуустары баһыйан, инники күөҥҥэ таҕыстыбыт. Уопсай түмүккэ Таатта — 1, Уус Алдан — 2-ис, Чурапчы 3 миэстэ буолан, биһиги көһө сылдьар кубогынан наҕараадаланныбыт. Урут да биһиги үлэбитигэр-хамнаспытыгар эриэ-дэхси ситиһиилэрдээх буолааччыбыт, былааммытын куруутун толоробут.

— Тэрилтэ инники күөҥҥэ сылдьарыгар үлэһиттэр оруоллара улахан буоллаҕа. Хас үлэһиттээххиний? Бастыҥ үлэһиттэргин ааттаталыаҥ дуо? — Тэрилтэ толору штаттаах. Уопсайа улуус үрдүнэн почтаҕа 44 киһи үлэлиир. Ытык Күөлгэ 22 үлэһит баар. Саҥа штат инструктор диэн эбилиннэ. Кини сурук, посылка өттүн саҕаланыаҕыттан тиэрдиллиэр диэри сүрүннүүр, хонтуруоллуур. Биэс учаастакка почтальоннар бааллар, 3 оператор, 2 массыынаҕа 2 суоппар, 1 сопровождающай диэн суоппардарга көмө үлэһит уо.д.а. бааллар, аны урукку өртүгэр почтальон уоппускаҕа бардаҕына бэйэ бэйэлэрин солбуйсаллара, билигин алтыс почтальонунан Андрей Ефимов диэн үлэһити ылан, почта тиэрдиитигэр проблема суох буолла. Уопсайынан, хамнас улаатан, урукку курдук үлэҕэ кадр халбаҥнааһына суох, олохтоохтук киирэн үлэлии сылдьаллар, үлэһиттэр эдэрсийдилэр. Почтаны нэһилиэктэргэ тиэрдиигэ икки массыыналаах буолан харгыс суох. Саҥа үлэһиттэр Харбалаах почтатыгар бааллар уонна Ытык Күөлгэ оператордар уларыйдылар. Атын нэһилиэктэргэ бары уопуттаах, бэйэлэрин идэлэрин толору баһылаабыт дьон үлэлииллэр.

Саамай киэн тутта ааттыыр үлэһиппит Вера Игнатьевна Андреева. Кинини Ытык Күөл олохтоохторо бары даҕаны үчүгэйдик билэллэр. Бүтүн Саха сирин норуотун тапталлаах ырыаһыта Игнатий Слепцов төрөппүт кыыһа, Ньурба улууһугар оҕо-уруу тэнитэн олорон, эмиэ почтаҕа үлэлээн баран, төрөөбүт дойдутугар эргиллэн сөбүлүүр идэтигэр үлэлии киирбитэ ыраатта. Олоҕу кытта тэҥҥэ иннин диэки хардыылыыр, саҥаны-бастыҥы ылынан иһэр, түргэнник үөрэнимтиэ, олох эрэллээх, үлэтигэр бэриниилээх, сүрдээх сэмэй киһи да, ылыммытын тиһэҕэр тиэрдэр үлэһиппит. Кини биэнсийэни дьиэҕэ тиэрдэр, кырдьаҕастарга кыһамньылаах, кинилэр кыһалҕаларын быһаарсар араас өҥөнү оҥорор мобильнай переносной кассалаах сылдьар. Коммунальнай төлөбүрдэри, сурутууну, страховканы, атын да өҥөлөрү оҥорор. Дьон киниэхэ сөбүлээн суруйтарар. Холобурга, сыл иккис аҥаарыгар «Таатта” хаһыакка сурутууга улууска ыытыллыбыт күрэхтэһиигэ 157 киһини сурутан кыайыылааҕынан тахсыбыта. Иккискэ 67 сурутааччылаах Баайаҕа почтальона Клара Мандарова, үһүскэ 48 киһилээх Кыйы почтальона Мотрена Максимова тахсыбыттара. Клара Васильевна эмиэ бастыҥнар ахсааннарыгар киирэр. Эрдэ этэн аһарбытым курдук Томтор отделениета улахан почталары кытта тэҥ былааннаах уонна өрүү былаанын толорон иһэр, быйыл Мандарова К.В. УФПС Бочуотунай грамотатынан наҕараадаланан сыралаах үлэтэ сыаналанан үөрэ сылдьабыт. Урукку өртүгэр үлэтинэн бастаан Кореяҕа путевканан наҕараадаланан турар.

Ити курдук улуус биир улахан кырдьаҕас тэрилтэтэ тигинэччи, ситиһиилээхтик үлэлии олорор. Кинилэргэ сыралаах үлэлэрэ куруутун таһаарыылаах, дьон махталын ыла туралларыгар, доруобай буолалларыгар баҕарыаҕыҥ.

Аграфена Неустроева

Таатта хаһыат

Следите за самым важным и интересным в Telegram-канале и WhatsApp-группе ЯСИА
0
0