Бэлиитикэ сорох күүстэрэ уопсастыба бигэтийиитин түөрэҥнэтэ сатыылларын туһунан СИА-ҕа Андрей Борисов эттэ.
«Туохха барытыгар тойон — норуот. Киниэхэ сулууспалаа, кини интэриэһин өрө тут!», — диэн Алампа тылларын Андрей Борисов холобур быһыытынан аҕалар.
«Биһиги бары биир «тыыга» олорсон иһэбит, бары биир дьылҕалаахпыт. Бэлиитикэ сорох күүстэрэ оппозиция буола сатаан олорон иһэр ити тыыбытын түөрэҥнэтэллэр. Бу барыта өрөспүүбүлүкэ да, Арассыыйа да олохсуйбут сыаннастарыгар сөп түбэспэт. Миигин өйөөбүт дьоҥҥо махтанабын», — диир Борисов.
Саха сирин биллилээх режиссера, бэлиитикэ деятелэ балаҕан ыйын 18 күнүгэр буолаары турар Госдума быыбарыгар бэйэтин кандидатуратын туруоруммута. Быыбар иннинээҕи киирсии биир кыттыылааҕын үҥсүүтүнэн өрөспүүбүлүкэтээҕи Быыбар киин хамыыһыйата илии баттааһын лииһигэр кэккэ кэһии баарын быһаарбыта. Ол иһин кинини кандидат быһыытынан регистрациялыырга аккаастаабыта. Саха сирин Үрдүкү суута кинини өйөөбүтэ эрээри ону РФ Үрдүкү суута көтүрбүтэ. Онон, Андрей Борисов быыбарга кыттар бырааба бобуллубута.
