Дьокуускайга “Триумф” спорт киинигэр мас тардыһыытыгар Арассыыйа, Европа, аан дойду чөмпүйүөнэ, спорт бочуоттаах маастара, Амма ааттааҕа Анатолий Баишев бирииһигэр олунньу 18 күнүгэр өбүгэ оонньуутугар турнир ыытылынна. Манна Ньурба Маалыкайыттан төрүттээх Владимир Федоров кыайыылаах таҕыста.
Күрэхтэһиигэ Саха сирин араас улууһуттан 18 уол кытынна. Кинилэри кытта, “Бодилайн” фитнес-киин инструктора, бодибилдер, пауэрлифтинынан дьарыктанар Гаврил Винокуров сочуоту таһынан күрэхтэстэ. Уолаттар уопсайа биэс көрүҥҥэ илин-кэлин түһүстүлэр. “Сыарҕаны соһуу” түһүмэххэ 120 киилэ ыйааһыннаах кумахтаах кууллаах сыарҕаны состулар. Манна Мэҥэ Хаҥаластан Айсен Спиридонов 26,40 сөкүүндэнэн кэлэн бастаата. Оттон иккис түһүмэххэ — “Амма таастарын көтөҕүүгэ” 70, 80, 90, 100 уонна 110 киилэлээх кумахтаах кууллары араас үрдүктээх туумбаларга уурдулар. Манна 20,75 сөкүүндэнэн биэтэккэ бастакынан кэлэн, Горнай мадьыныта Дьулустаан Ноговицын иннин кимиэхэ даҕаны биэрбэтэ. Бу икки түһүмэх кэнниттэн күрэхтэһиигэ аҕыс уол хаалла – Владимир Федоров (Ньурба), Егор Баишев (Амма), Спиридонов Айсен (Мэҥэ Хаҥалас), Никита Гоголев (Өлөөн), Руслан Ядреев (Кэбээйи), Игорь Кондаков (Амма), Дьулустаан Ноговицын (Горнай), Алексей Кутуков (Нам).
Бу хаалбыт уолаттар “Илии күүһэ”, “Балаҕан нөҥүө тааһы быраҕыы” уонна “Тааһы көтөҕүү” түһүмэхтэргэ кииристилэр. “Илии күүһүгэр” арматура токурутуохтаахтарын биир даҕаны боотур сатаан токуруппата. Онон, судьуйалар уолаттарга барыларыгар аҕыстыы очукуону суруйдулар. “Балаҕан нөҥүө тааһы быраҕыыга” дьаадыраны 11, 47 м ыраахха быраҕан, Егор Баишев бастаата. “Тааһы көтөҕүүгэ” Дьулустаан Ноговицын 170 миэтэрэҕэ 110-ча киилэлээх тааһы көтөҕөн илдьэн бу көрүҥҥэ эмиэ бастаата.
Инньэ гынан, уопсай түмүккэ Ньурбаттан сылдьар Владимир Федоров бастаан таҕыста уонна 200 тыһ. солк. уу харчынан наҕараадаланна. Иккис – Амма мадьыныта Егор Баишев, үһүс Мэҥэ Хаҥаластан Айсен Спиридонов буоллулар.
