Саха сирин спортсмена Анастасия Диодорова 2016 сыллааҕы Рио-де-Жанейроҕа ыытыллар Параолимпийскай оонньууларга путевканы биэрэр Россия чемпионатыгар кыттар. Күрэхтэһии муус устар 7-11 күннэригэр Москва уобалаһын Раменское куоратыгар ыытыллар.
2013 сыллааҕы аан дойду чөмпүйүөнэ, 2008 сыллаахха Пекин куоракка ыытыллыбыт Параолимпийскай оонньууларга үрүҥ көмүс мэтээли ылары ситиспит Анастасия, бу күннэргэ буола турар күрэхтэһиигэ Саха сирин эрэ аатын буолбакка, олорор, дьарыктанар Москва куоратын аатыттан кыттар.
Манна Россия 40-тан тахса регионуттан 200-чэ спортсмен кыайыы иһин киирсиэхтэрэ. Кинилэр ортолоруттан сүүмэрдэммит хамаандатын чилиэннэрин талыахтара. Күрэхтэһии кэнниттэн хамаанда Португалия Фуншай куоратыгар Европа аһаҕас чемпионатыгар кыттыаҕа. Онно кинилэр Параолимпийскай оонньууларга ирдэниллэр квалификационнай стандарты туттарыахтара.
This post was published on 08.04.2016 18:03 18:03