Нам улууһун олохтоохторо анал байыаннай дьайыы кыттыылаахтарыгар туох баар көмөлөрүн утары ууналлар. Билиҥҥитэ улуустан төрдүс төгүлүн барар делегация мал-сал, баһыылка хомуйан бэлэмнэнэ сылдьар.
Хорсун буойуттарбытыгар ас-үөл сибиэһэйдии тиийэригэр кыһаллаллар. Оттон эт ас сибиэһэйдии, эргэрбэккэ тиийэрэ уустук дьыала. Делегация бастаан барыытыгар Граф Биэрэгэр эттэн аһы-үөлү оҥорон таһаарар сыахтаах урбаанньыт Дмитрий Аргуновка сүбэлэппит. Онуоха Дмитрий Аргунов ыыһаммыт эт өр буорту буолбатын, бэйэтэ оҥорон биэриэн сөбүн туһунан кэпсээбит.
Бу да сырыыга Партизантан «Бэттиэмэ» бааһынай хаһаайыстыба көмө быһыытынан биэрбит убаһатыгар өссө биири эбэн Дмитрий Дмитриевичкэ биэрбиттэр. Урбаанньыт бэлэм эти сыаҕар бэйэтэ эрбэтэн, тууһаан, ыыһаан бэлэмнээтэ. Бэлиэтээн эттэххэ, Дмитрий Аргунов бэйэтин кылаатын киллэрэн, төрдүс төгүлүн буор-босхо ыыһаан биэрдэ. Намнааҕы техникум устудьуоннара практическай уруок быһыытынан көмөлөстүлэр. Ыыһаммыт эти анал оһохтон таһааран сойутан баран, ас пленкатынан суулаан тоҥороллор.
Дмитрий Аргунов кэпсииринэн, анал байыаннай дьайыыга сылдьар аймах уолаттара оҥорбут этин амсайбыттарын, туох тиийбэтин, тугу эбиэххэ сөбүн санааларын истэн, бары өттүнэн табыгастаах, сөптөөх ырысыабы оҥорон таһаарбыт. Онон, сотору кэминэн ыыһаммыт сибиэһэй эти уолаттарбыт амсайан күүстэригэр күүс, уохтарыгар уох эбиллиэҕэ. Төрөөбүт дойдуларын аһа туохтааҕар да күндү уонна минньигэс буоллаҕа.
Ааптар: Анна Созонова, «Нам улууһа» МТ пресс-сулууспата
This post was published on 01.11.2024 11:08 11:08