Анаабыр улууһа бу күннэргэ тэриллибитэ 90 сылын бэлиэтиир. Тустаах дьаһалы 1930 сыллаахха ахсынньы 10 күнүгэр бүтүн Арассыыйатааҕы киин толорор кэмитиэт таһаарбыт.
Анаабыр оройуона тэриллэригэр судаарыстыбаннай, уопсастыбаннай диэйэтэл Максим Аммосов көҕүлээһининэн 1925 — 1930 сылларга Анаабыр сиригэр СССР наукаларын Академиятын Саха сиринээҕи биир кэлим экспедициятын киэҥ далааһыннаах чинчийиитэ сүрүн төрүөтүнэн буолбут.
Анаабыр олохтоохторун Ил Дархан уонна бырабыыталыстыба дьаһалтататын салайааччы Афанасий Владимиров эҕэрдэлээтэ.
Кини улуус тэтимнээхтик сайдарын, дьон олороругар табыгастаах усулуобуйа тэриллэрин, олохтоох дьон ахсаана эбиллэрин эттэ. Анаабыр улууһугар чох, ниэп, гаас хостонорун, «Анаабыр алмаастара» тэрилтэ түөлбэлээн үлэлиирин эттэ.
Анаабыр дьоно Социалистическай үлэ Дьоруойа, табаһыт Илья Константинович Спиридонов, өрөспүүбүлүкэ бочуоттаах олохтооҕо, уопсастыбаннай, политическай диэйэтэл Николай Егорович Андросов, худуоһунньук Юрий Васильевич Спиридонов, улуус бочуоттаах ыала Анна, Капитон Гольдеровтар, элбэх оҕолоох Туприннар ааттарынан киэн туттар.
Афанасий Владимиров Анаабыр олохтоохторугар кытаанах доруобуйаны, омук быһыытынан уратыларын тутан, кэлэр көлүөнэҕэ тиэрдэллэригэр баҕарда.
