Саха сирин баһылыга Айсен Николаев Ыйааҕынан өрөспүүбүлүкэҕэ Саха сирин Арктикатын оройуоннарыгар уу биоресурсаларын искусственнайдык үөскэтиигэ үлэ барар.
Бырайыак сүрүн соругунан балык саппааһын туруктаах таһымын өйөөһүн, уу фаунатын көрүҥнэрин араастаһыытын харыстааһын уонна хотугу сир олохтоохторун төрүт аһынан хааччыйыы буолар.
«Саха сирин Арктикатын оройуоннарыгар сүрүн промысловай көрүҥ чыыр буолар. Онон Арктика сиригэр-уотугар уу эбийиэктэригэр сиг көрүҥнэрин личинкэлэринэн балыгы үөскэтии барар. Анаабыр өрүскэ 2025 сылга Чернышевскай балыктыыр собуоттан аҕалыллыбыт 200 тыһыынча чыыр личиинкэтэ таһаарылынна», — диэн өрөспүүбүлүкэ бырабыыталыстыбатын бэрэссэдээтэлин солбуйааччы Ольга Балабкина иһитиннэрдэ.
Бигэргэтиллибит кыраапык быһыытынан кэлин сылларга балыктааһыны элбэтиигэ итинник дьаһаллар былааннаннылар. Ол курдук, 2026 сылга чыыр ахсаанын салгыы элбэтэргэ 200 тыһыынча кэриҥэ эбии көрүлүннэ.
Былаан быһыытынан, 2029 сылга диэри Саха сирин Арктикатын оройуоннарын балык хаһаайыстыбатын суолталаах уу эбийиэктэригэр 700 тыһыынчаттан итэҕэһэ суох личиинкэ таһаарар былаан баар.
Ону таһынан бырагыраама уу биоресурсаларын таһаарыы эйгэтигэр квалификациялаах исписэлиистэри бэлэмнээһиҥҥэ туһуламмыт научнай чинчийиилэр уонна үөрэх дьаһалларын комплексын олоххо киллэриини көрөр. Бу дьаһаллар өрөспүүбүлүкэ балык хаһаайыстыбатын бигэ сайдыытын хааччыйар уонна Саха сирин Арктикатын тардыытын экосистемаларын экологическай балаһыанньатын харыстыыр кыахтаныахтара.
This post was published on 22.10.2025 10:21 10:21