Бэҕэһээ, балаҕан ыйын 20 күнүгэр, 22.00 чааска Амур уобалаһын Сковородино куоратын «Лена» айан суолун 8-с килэмиэтиригэр суол саахала буолла, НВК телеграм-ханаала суруйар.
Саха сирин олохтоохторо айаннаабыт «Тойота Лит Айс Ноах» массыыналара икки «Вольво» таһаҕас массыынатын кытары харсыспыт.
Быһылаан түмүгэр суоппар элбэх эчэйиини ылла, 1978, 1963, 1989 уонна икки 1956 сыллаах төрүөх дьахталлар миэстэтигэр тыыннара быстыбыт. Оттон 1959 сыллаах төрүөх дьахтар балыыһаҕа киирэн баран өлбүт.
Суол саахалыгар түбэспит массыына Саха сириттэн Улан Удэҕэ айаннаан испит, 14-с регион буолара бэлиэтэннэ.
Ил Дархан Айсен Николаев суол быһылааныгар сырдык тыыннара быстыбыт дьон дьиэ кэргэттэригэр дириҥ кутурҕанын биллэрдэ уонна чугас дьонноругар көмө оҥоһуллуоҕа диэн эрэннэрдэ.
This post was published on 21.09.2023 17:57 17:57