“Үлэ киһитэ” номинацияҕа түмүк куоластааһын түмүгүнэн кыайыылааҕынан “Якутскэнерго” Амматааҕы РЭС монтера Михаил Лазарев тахсыбыта. Мөдиа-кииҥҥэ наҕараадалааһын кэмигэр биир дойдулаахтара Амма улууһуттан бу үһүс наҕараада буоларын бэлиэтээбиттэрэ.
“Бу биһиги үһүс кыайыыбыт. “Сахамедиаҕа” махталбыт улахан. Амма 3 киһитэ кыайыыта – чиэс уонна бочуот”, — диэтилэр аммалар.
Наҕараадалааһыҥҥа предприниматель Руслан Федотов эмиэ кытынна. Кини наҕараада бэйэтин дьоруойун булбутуттан үөрэрин биллэрдэ.
Михаил Лазарев Якутскэнергоҕа 1972 с. үлэлиир. Үлэтин электромонтертан саҕалаабыта. 1987 с. Амматааҕы РЭС-кэ уоту биэрэр ситими үлэлэтиигэ электромонтерунан көспүтэ. “Гражданскай килбиэн” анал бэлиэлээх Михаил Лазарев бэтэрээннэр сэбиэттэригэр баар, олохтоох сэбиэт дьокутаата, бальнай үҥкүүнэн уонна тыйаатыр искусствотынан дьарыктанар.
“Сахамедиа” генеральнай дириэктэрин бастакы солбуйааччы Афанасий Ноев Михаил Кузьмич курдук үлэһит дьон баар буолан, дьиэбитигэр мэлдьи уоттаахпыт диэн махтанна.
Григорий Фоменко,
Мария Васильева түһэриитэ
