Амма улууһугар Амма сэлиэнньэтигэр уонна Покровкаҕа баар оскуолаларга харантыын биллэрилиннэ. Тумуу ыарыыта элбээтэ. ЯСИА-ҕа улуустааҕы кылаабынай санитарнай быраас Айаллаана Романова эппитинэн, икки күҥҥэ 319 киһи ыарыйда.
«Эпидпорог оройуоҥҥа нуорманы куоһарда. Бэнидиэнньиктэн 319 киһи ыарыйда, ол иһигэр 300 оҕо. Бэҕэһээ хамыыһыйа үлэлээтэ, Амма сэлиэнньэтигэр ОРВИ уонна тумуулаабыт киһи ахсаана элбэх. 1–8 кылаас оҕолоругар харантыын биллэрилиннэ, биир нэдиэлэ, Амма сэлиэнньэтигэр уонна Покровкаҕа. Атын нэһилиэктэргэ харантыын суох», — ЯСИА-ҕа эттэ Айаллаана Романова.
Роспотребнадзор дааннайынан, муус устар 13 күнүгэр өрөспүүбүлүкэҕэ 9115 ОРВИ баара бэлиэтэннэ, ааспыт нэдиэлэни кытта тэҥнээтэххэ, көрдөрүү 15,2% элбэх.
Тумуу вируһа 75,5%, тумуута суох этиология вируһугар – 21,1%, COVID-19 – 1,4%.
This post was published on 16.04.2025 15:03 15:03