Амма улууһун баһылыга Николай Архипов Өлүөнэ муостатын тутуу өрөспүүбүлүкэ олохтоохторугар элбэх кыаҕы үөскэтэр, ордук илин эҥэрдэргэ диэтэ. Ол туһунан ulus.media саайтка сигэнэн СИА суруйар.
“Өлүөнэ муостатын тутуу — Саха сирин олохтоохторо өр күүппүт событиелара. Тута элбэх кыһалҕалаах боппуруос быһаарыллар. Ордук илин эҥэр улуустар олохтоохторугар, ол иһигэр аммаларга. Сылын аайы күһүн-саас суолбутугар эрэйдэнэбит. Биллэн турар, билигин салгын сыттыктарынан айаннаан, алтьернатива баар курдук. Ити эрээри бу олус ороскуоттаах. Куоракка киириини-тахсыыны киһи эрэ уйунар кыахтаах буолбатах. Ордук дьиэ кэргэттэргэ кыһарҕаннаах. Сүрүн табаар, эмп-том, тутуу матырыйаала Дьокуускайтан таһыллар. Онон социальнай суолталаах боппуруостарга охсуулаах. Биһиги муоста тутуллуутугар олус үөрэбит. Сылы эргиччи хааччаҕа суох суолланарбытын күүтэбит”, — диэтэ Николай Архипов.
This post was published on 02.12.2020 18:01 18:01