Амма улууһугар тыа хаһаайыстыбатын управлениета сайыҥҥы үүт үрүлүйэр кэмигэр ыанньыксыттар, хаһаайыстыбалар икки ардыларыгар күрэхтэһиини ыытан, бу күннэргэ түмүктэри таһааран, кыайыылаахтар билиннилэр.
Социалистическай Үлэ Геройа, аатырбыт ыанньыксыт, Аҕа дойду улуу сэриитин бэтэрээнэ Петр Ионович Яковлев төрөөбүтэ 100 сылыгар анаан, улуустааҕы тыа хаһаайыстыбатын управлениета тэрээһиннээх уонна бааһынай хаһаайыстыбалар ыанньыксыттарын, ону сэргэ хаһаайыстыбалар икки ардыларыгар үрдүк үүтү ыаһыҥҥа сайыҥҥы түөрт ыйга күрэх биллэрбитэ. Бу күннэргэ түмүк тахсан кыайыылаахтар быһаарылыннылар.
Тэрээһиннээх хаһаайыстыбаларга бастыҥнарынан “Илгэ” ХЭТ буолла. Ол курдук бастакы миэстэни “Оһохтоох” сайылыга хас биирдии ынаҕыттан 1291,83 киилэ үүтү ыан ылла. Иккис миэстэ эмиэ бу хаһаайыстыба “Дьаам” сайылыга биирдии ынаҕыттан 1188,54 киилэ үүтү ыан буолла. Үһүс бириистээх миэстэҕэ “Бөтүҥ” ТХПК “Туора” сайылыга таҕыста. Бу сайылык ыанньыксыттара биирдии ынахтарыттан 1154,02 киилэ үүтү ыатылар.
Тэрээһиннээх хаһаайыстыбалар ыанньыксыттар ортолоругар эмиэ Абаҕа нэһилиэгэр баар “Илгэ” ХЭТ ыанньыксыттара бириистээх миэстэлэри ыллылар. Ол курдук “Оһохтоох” сайылыгыттан Маргарита Деляева биир ынаҕыттан 1399,93 киилэ үүтү ыан кыайыылааҕынан таҕыста. Иккис миэстэ “Дьаам” сайылыгыттан Лилиана Анисимова биир ынаҕыттан 1329, 73 киилэ үүтү, үһүс миэстэ эмиэ бу сайылык ыанньыксыта Анна Устинова биир ынаҕыттан 1314,17 киилэ үүтү ыан буоллулар.
Бааһынай хаһаайыстыбаларга үлэлиир ыанньыксыттар ортолоругар кыайыылааҕынан Мээндиги нэһилиэгиттэн Дмитрий Адамов буолла. Дмитрий Иванович “Оһохтоох” сайылыгар сайылаата. Кини хас биирдии фуражнай ынаҕыттан 1923,61 кииилэ үүтү ыата. Онтон иккис миэстэ Сатаҕайыттан “Оһох” сайылыктан “Чараҥнаах бааһынай хаһаайыстыба ыанньыксыта Лена Никитина буолла. Кини биирдии ынаҕыттан 1480, 80 киилэ үүтү ыата. Үһүс миэстэни биирдии ынаҕыттан 1394, 67 киилэ үүтү ыабыт Бөтүҥтэн “Чолбон” бааһынай хаһаайыстыба ыанньыксыта Максим Стручков ылла. Кыайыылаах үрүҥ илгэни дэлэтээччилэри истиҥник эҕэрдэлиибит!
