Амма улууһун Амма сэлиэнньэтигэр 200 миэстэлээх саҥа поликлиника тутуута кыраапык быһыытынан баран иһэр. Эбийиэк Владимир Путин көҕүлээбит «Продолжительная и активная жизнь» нацбырайыак чэрчитинэн тутуллар.
Тутууну 2024 сыл кыһын саҕалаабыттара. Билигин таас куорпус дьэндэйдэ.
«Билигин эбийиэккэ 62 исписэлиис үлэлиир. Түннүктэрэ туруорулуннулар. Ис үлэтэ, тас өттө оҥоһуллар. Түмүктүүр түһүмэх — уу ёмкоһа турар сирин бетоннааһын», — диэтэ кылаабынай бырааһы солбуйааччы Дмитрий Васильев.
Тутуу 2025 сыл төрдүс кыбаарталыгар түмүктэниэхтээх. Саҥа поликлиника наадалаах медицина тэрилинэн уонна миэбэлинэн хааччыллар.
Санаттахха, «Продолжительная и активная жизнь» бырайыагынан Саха сиригэр кэнники сылларга бөдөҥ медицина эбийиэктэрэ Чурапчыга, Ытык-Күөлгэ, Хонууга, Уус Майаҕа тутулуннулар.
This post was published on 17.07.2025 11:03 11:03