Аммаҕа култуура миниистирэ Юрий Куприянов кэлэн «Култуура» национальнай бырайыагынан барар үлэни билистэ. Ол курдук А.А.Черемных аатынан оҕо ускуустубатын оскуолатыгар бара турар хапытаалынай өрөмүөнү, Ф.Ф.Потапов аатынан норуот айымньытын дьиэтигэр ыытыллыбыт үлэ түмүктэрин көрдө. Бу кэнниттэн эһиилги былааҥҥа киирбит У.Г.Нохсоороп аатынан Абаҕатааҕы духуобунас дьиэтигэр сырытта, култуура уонна ускуустуба эйгэтин үлэһиттэрин кытта көрсөн кэпсэттэ.
А.А.Черемных аатынан оҕо ускуустубатын оскуолатыгар (дириэктэр Любовь Заварзина) култуура уонна духуобунай сайдыы миниистирэ Юрий Куприянов кэлэн «Култуура» федеральнай национальнай бырайыагынан бара турар хапытаалынай өрөмүөн хаамыытын билистэ. Оробуочай бөлөххө министиэристибэ салаатын начаалынньыга Вера Моисеева, улуус баһылыга Николай Архипов, баһылыгы тутууга солбуйааччы Виктор Смирников, култуура салалтатын салайааччыта Иван Иванов онтон да атыттар сырыттылар.
Санатар буоллахха, улууска бу бырайыагынан ааспыт сылга бу оскуолаҕа 6,8 мөл.солк сууммаҕа муусука тэриллэрэ, үөрэх матырыйааллара, тээбириннэрэ кэлбиттэрэ. Маны таһынан Ф.Ф.Потапов аатынан норуот айымньытын дьиэтигэр (дириэктэр Петр Кулаковскай) 12,5 мөлүйүөннээх көрөөччү саалатын өрөмүөнэ ыытыллыбыта уонна бу сылга 4 мөл 700 тыһ. солк. сууммаҕа көһө сылдьар элбэх хайысхалаах култуура киинэ автоклуб кэлэр буолбута. Юрий Степанович ускуустуба оскуолатын кэрийэн көрдө, тутааччылар үлэлэрин билистэ, эбии көмөнү оҥорорго эттэ. Бу кэнниттэн Ф.Ф.Потапов аатынан норуот айымньытын дьиэтигэр сылдьан ыытыллыбыт өрөмүөнү көрдө-иһиттэ, улахан үлэ барбытын үрдүктүк сыаналаата.
Алтана Артемьева
Амма олоҕо
