21 Тохсунньу 21.01
  • -48°
  • $ 73,82
  • 83,32

Аммаҕа илин эҥэр улуустар бэрэстэбиитэллээх органнарын Ассоциациятын семинара буолла

11:42, 03 марта 2016
Текст:

Илин эҥэр улуустар бэрэстэбиитэллээх органнарын Ассоциациятын семинара уонна төгүрүк остуола Бүтүн Россиятааҕы олохтоох бэйэни салайыныы Саха сиринээҕи салаатын көҕүлээһининэн ыытыллынна. Улуус Сэбиэтин бэрэссэдээтэллэрэ, улуус уонна нэһилиэк бэрэстэбиитэллээх органнарын депутаттара, ону сэргэ нэһилиэктэр баһылыктара, КУМИ-лар салайааччылара көхтөөх кыттыыны ыллылар.


Семинарга «Олохтоох бэйэни салайыныы органнарын үлэлэригэр коррупцияны утары үлэ», «Олохтоох бэйэни салайыныы тирээн турар боппуруостарын туһунан», «Олохтоох бэйэни салайыныы туһунан сокуоҥҥа уларыйыылар тустарынан», «Илин эҥэр улуустар муниципальнай тэрээһиннэрин устааптарын сокуоннарын туругун туһунан» диэн иһитиннэриилэр оҥоһуллан элбэх боппуруостары үөскэттилэр.

СӨ Ил Дарханын иһинэн баар коррупционнай уонна атын быраабы кэһиилэри утары сэрэтэр үлэ Департаменын салайааччыта Федор Борисов: «Аны бу сылтан ыла 303-с Федеральнай Сокуон быһыытынан бары депутаттар, ол иһигэр нэһилиэк депутаттара бэйэлэрин, кэргэттэрин уонна сокуоннай сааһын ситэ илик оҕолоругар дохуоттарын туһунан сибидиэнньэни биэриэхтээхтэр«, — диэбитин, күүскэ утардылар. Оннук буолар буоллаҕына, буор босхо үлэлии сылдьар депутаттар олох да аккаастанан, букатын да депутаттара суох хаалыахпытын сөп диэн буолла.

Киэҥ кэпсэтии «Босхо гектар» сокуон барылын тула буолла. Манна сүрүн иһитиннэриини сокуон киириитигэр пилотнай бырайыак буолбут Нам улууһун КУМИ-тын салайааччыта Владимир Соловьев оҥордо. Киирбит этиилэринэн боротокуол суруллан буолаары турар муниципальнай тэрээһиннэр съезтэригэр этии быһыытынан киирэригэр санааларын эттилэр.

«Маннык көрсүһүүлэр олус наадалар, үлэҕэ-хамнаска туһалаахтар. Кэпсэтии темаларын депутаттар бэйэлэрэ киллэрэллэр. Онон олус интэриэһинэйдик ааһар. Россия таһымыгар биһиги өрөспүүбүлүкэбит Сэбиэтэ ыытар үлэтинэн үһүс миэстэҕэ таҕыстыбыт», — диэн бэлиэтиир ВСМС Саха сирин салаатын салайааччыта, Дьокуускай куорат депутаттарын Думатын бэрэссэдээтэлэ Александр Саввинов.

0
0
21 января 21.01
  • -48°
  • $ 73,82
  • 83,32