Туркменистааҥҥа бүгүн тутулуга суох буолуу күнэ. Социалистыы үлэ дьоруойдара Дмитрий Андреев, Прокопий Быканов, композитордар Валерий Кац уонна Валерий Шадрин төрөөбүттэр.
Аудиовизуальнай нэһилиэстибэ аан дойдутааҕы күнэ бастакытын 2007 сыллаахха ЮНЕСКО быһаарыытынан бэлиэтэммитэ. Бу XIX—XXI үйэлэргэ буолбут түбэлтэлэр тустарынан киинэлэр, араадьыйа уонна теле бырагырааммалар, аудио- уонна видео- суруйуулар инники көлүөнэлэргэ чөл туруктаах хаалалларыгар болҕомто уурар күн.
Алтынньы 27 диэн Григориан халандаарыгар сыл 301-с күнэ (ордук хонуктаах сылга 302-c күнэ). Сыл бүтүө 64 күн баар.
Бэлиэ күннэр:
- ЮНЕСКО — Аан дойдутааҕы аудиовизуальнай нэһилиэстибэ күнэ.
- Түркменистаан — Тутулуга суох буолуу күнэ.
Түбэлтэлэр:
- 1806 — Наполеон Пруссияны кыайан Берлиҥҥэ киирбит.
- 1924 — Сэбиэскэй Сойуус иһигэр Узбек ССР тэриллибит, киин куоратынан Ташкент буолбут. Бу саҕана Ташкены казахтар эмиэ бэйэлэригэр ылан киин куорат оҥостуохтарын баҕарбыттар эбит, ол мөккүөрү Сталин быһаарбыт.
- 1947 — Саха АССР-га Садын оройуона суох буолбут. Оройуон нэһилиэктэрэ Сунтаар уонна Ленскэй оройуоннарыгар тиксэриллибиттэр. Билигин ол нэһилиэктэр Мирнэй улууһугар киирэллэр.
- 1982 — Кытай бэйэтин нэһилиэнньэтин ахсаана миллиарды куоһарбытын туһунан биллэрбит.
- 1990 — Чувашияҕа «Чуваш ССР тылларын туһунан» сокуон ылыллыбыт. Чуваш тыла нуучча тылын кытта тэҥ бырааптаммыт.
- 1991 — Туркменистан Сэбиэскэй Сойуустан тутулуга суох буолбут. Бэрэсидьиэнинэн өрөспүүбүлүкэни 1985 сылтан ыла салайан олорбут Сапармурат Ниязов буолбут. Кини Туркменистаны 2006 сыллаахха диэри салайбыта.
Төрөөбүттэр:
- 1907 — Елизавета Убрятова (04.03.1990 өлб.) — филология билимин дуоктара, профессор, Саха АССР билимин үтүөлээх үлэһитэ (1956), Тыва АССР билимин үтүөлээх үлэһитэ (1977), тюрколог, саха тылын уонна атын түүр тылларын грамматикатын уонна диалектарын специалииһэ.
- 1912 — Дмитрий Андреев — Сунтаар оройуонун «Элгээйи» совхоз биригэдьиирэ, Социалистыы Үлэ Дьоруойа, Сунтаар улууһун Ытык олохтооҕо.
- 1938 — Прокопий Быканов — бульдозерист, Социалистыы Үлэ Дьоруойа, Усуйаана улууһун Ытык олохтооҕо.
- 1940 — Валерий Кац — композитор, Дьокуускайдааҕы муусука училищетын учуутала, Саха Өрөспүүбүлүкэтин ускуустубатын үтүөлээх диэйэтэлэ, Ойуунускай бириэмиэйтин лауреата.
- 1960 — Валерий Шадрин — эбэҥки бастакы композитора, СӨ үтүөлээх диэйэтэлэ, СӨ култууратын туйгуна.
Өлбүттэр:
- 1605 — Улуу Акбар — Моҕол Импиэрийэтин үһүс баhылыга. Импиэрийэ төрүттээччитин Баабыр сиэнэ. Кини салалтатын саҕана Моҕол Импиэрийэтэ Хоту Ииндийэ улахан өттүгэр тэнийбитэ.
- 1988 — Иван Аргунов — (24.12.1922 төр.) — социолог учуонай, өрөспүүбүлүкэҕэ биллэр-көстөр баартыйа диэйэтэлэ, суруналыыс, устуоруйа билимин хандьыдаата,
This post was published on 27.10.2020 09:01 09:01