21 От ыйа 21.07
  • 22°
  • $ 88,02
  • 96,04

Ойуурга алта күн устата муна сылдьыбыт киһини буллулар

14:36, 06 сентября 2016
Читайте нас на
Яндекс Новости
ЯДВ

Алта күн устата ойуурга муна сылдьыбыт 38 саастаах эр киһини буллулар. Бу киһи сир астыы сылдьан мунан хаалбыт. Балаҕан ыйын 2 күнүгэр кинини госинспектордар «Кэҥкэмэ» ураты харыстанар сиргэ былааннаамматах бэрэбиэркэни ыыта сылдьан буллулар.


Госинспектордар Герасим Оконешников, Альберт Кривошапкин уонна Николай Сорокоумов былааннамматах бэрэбиэркэҕэ барбыттар.

«Булт саҕаламмыт кэмигэр үлэ элбэх. Ураты харыстанар сири кэрийэ сылдьан бу киһини булан ылбыппыт», — диэн СИА-ҕа Герасим Оконешников этэр.

Муммут киһи ыксаабыт, сылайбыт-элэйбит көрүҥнээҕэ. Киниэхэ суһал медицинскэй көмө оҥоһуллубут. Атырдьах ыйын 28 күнүгэр кини даачаларга сылдьар автобуһунан Бүлүүлүүр суол 18 км тиийбит уонна ойуурга сылдьан муммут.

Аймахтара кинини улууска барбыт дии санаан кыһаллыбатахтар. Эр киһи тэллэйинэн, сир аһынан үссэммит. Түүнүн отуу оҥостон хоммут.

«Тыа сириттэн төрүттээх киһи буолан бачча кэм устатыгар ойуурга сылдьан тыыннаах хаалбыт», — дииллэр инспектордар.

«Хомойуох иһин, үгүс дьон тымныйан өлөллөр», — дииллэр кинилэр.

Следите за самым важным и интересным в Telegram-канале и WhatsApp-группе ЯСИА