Россия араас куораттарыттан мустубут альпинистар Муома улууһугар баар Черскэй сис хайатын – Победа өргөһүн дабайдылар. Бу хайаҕа бүтэһигин 1977 сыллаахха киһи тахса сылдьыбыта биллэр. Экспедиция түмүгүнэн кинилэр пресс-конференция оҥордулар.
Манна барыта 16 киһи сырытта, кинилэр ортолоругар улахан уопуттаахтар да, саҥа дьарыктанааччылар да бааллар. Россия үтүөлээх айанньыта Валерий Богмолов салайан илдьэ сылдьыбыт экспедициятыгар быраастар, быыһааччылар, тренердэр, инструктордар бааллар.
Салайааччы бэйэтэ Королев куораттан, оператор — Санкт-Петербургтан, альпинистар Василий Иванов уонна Александр Чистяков — Красноярскай кыраайтан, быыһыыр этэрээт салайааччыта Братскай куораттан, онтон атыттар сахалар.
Кинилэр 25 күн устата айаҥҥа сырыттылар уонна сүрүн сыалларын Саха сирин саамай үрдүк хайатын чыпчаалын дабайдылар. Ону таһынан геолог Сергей Обручев туһунан киинэ каадырдарын уһуллулар.
Альпинистар аата суох хайа өргөһүн Саха АССР төрүттэммитэ 100 сылыгар анаан — «Пик 100-летия ЯАССР» диэн ааттыырга этии киллэрэллэр. Бу өргөс үрдүгэ 2162 м.
«Бу аһара үрдүгэ суох. Спортивнай хайысхалаах экспедициялар мантан саҕаланыахтарын сөп», – диэн альпинизм федерациятын президенин солбуйааччы Александр Спиридонов эттэ.
Экстремаллар тахсыбыт иккис хайалара 2619 м. үрдүктээх. Чиэрскэй сис хайатын дабайыы – кинилэр үрдүк ситиһиилэрэ.
«Альпинистар ирбэт тоҥу үөрэтэр институкка анаан хайа мууһун аҕалбыттара. Улахан ириэрии кэмигэр онно тустаах чинчийиилэри оҥороллор», — диэн Дьокуускай куорат 2-с №-дээх оскуолатын үөрэнээччитэ Семен Данилов этэр.
Кини убайа Степан Данилов хайаҕа тахсарыгар бастакы күннэргэ ыарырҕаппытын туһунан кэпсээтэ.
Альпиниста Дмитрий Санаров: «Тулалыыр эйгэбитин кэтээн көрдүбүт. Наһаа кэрэ сирдэри көрдүбүт, хайа үрүйэлэрин, Муома мууһун туораатыбыт», — диир.
Экспедицияҕа альпинизм спордугар соҕотох кыыс Елена Цой аан бастаан маннык айаҥҥа сылдьыбыт.
This post was published on 01.08.2016 11:34 11:34