Дьокуускай баһылыга Евгений Григорьев уонна Яндекс хампаанньа региональнай бииргэ үлэлээһиҥҥэ дириэктэрэ Антон Москаленков бииргэ үлэлээһин туһунан сөбүлэһиигэ илии баттаатылар. Докумуоҥҥа култуура, үөрэх, куорат салалтатын, тырааныспар уонна цифровой сервистэр эйгэлэригэр холбоһуктаах бырайыактары олоххо киллэриини көрөр.
Дуогабар туһунан Дьокуускай мэрэ бэйэтин телеграм-ханаалыгар иһитиннэрдэ. Биир тутаах хайысханан цифровой эйгэҕэ саха тылын сайыннарыы буолуоҕа. Чуолаан, «Яндекс.Тылбаасчыт» сервис «Алиса» куолас көмөлөһөөччүтүн нөҥүө тылбааһы туһанарга кыах биэрэр толору аудио-тылдьыты оҥоруунан дьарыктаныаҕа. Анал бырайыак урут Татарстаҥҥа үлэҕэ киирбитэ.
Ону таһынан “Яндекс.Книги” сервискэ саха тылынан аудиокинигэлэрдээх, подкастаахтардаах туспа долбуур баар буолуоҕа. Евгений Григорьев бэлиэтээбитинэн, бырайыакка үлэ саҕаланна.
«Бу бырайыактар иккиэн биһиги тылбыт киэҥ эйгэни хабарыгар, бастатан туран — ыччат ортотугар көмөлөһүөхтэрэ дии саныыбын. Бу бырайыак Президент В.В. Путин биллэрбит Россия норуоттарын сомоҕолоһууларын сылыгар саҕаланара дириҥ суолталаах бэлиэ буолар», — диэн куорат баһылыга бэлиэтээтэ.
Дьокуускайга “Яндекс.Учебник” уонна “Яндекс.Лицей” пилотнай үөрэх бырайыактарын олоххо киллэрии саҕаланна. Мэр этэринэн, бу көҕүлээһиннэри кэҥэтии оскуола оҕолорун үөрэтии хаачыстыбатын уонна педагогтары бэлэмнээһин таһымын үрдэтиэҕэ, ордук информатика эйгэтигэр.
Бииргэ үлэлээһин өссө биир хайысхатынан “Яндекс.Архив” кыттыыта буолуоҕа, Дьокуускай 400 сылын көрсө архыып кумааҕы докумуоннарын сыыппараҕа таһаарыахтара. “Яндекс.Путешествие” сервиһи кытта бииргэ үлэлээһини көрөр, киирии туризмы сайыннарарга туһалаах буолуохтаах.
Ону таһынан «Яндекс.Такси» сервис инники сайдыыта дьүүллэһиллэр. Куоракка автопарканы кэҥэтии уонна пассажирдары хааччыйыы хаачыстыбатын үрдэтии чааһыгар.
This post was published on 17.02.2026 10:09 10:09