«Уһук Илин уонна Забайкалье» диэн парламент ассоциациятын уопсай мунньаҕар парламентарийдар тулаайах оҕолору олорор дьиэнэн хааччыйыыга анаммыт федеральнай сокуоҥҥа кэккэ уларытыылары киллэрэр туһунан этиилэрин чочуйдулар, суруйда Саха парламент.
Еврей аптаныамынай уобалаһын Сокуону таһаарар Мунньаҕын бэрэссэдээтэлэ Роман Бойко иһитиннэрбитинэн, «тулаайах уонна төрөппүт көрүүтэ-истиитэ суох хаалбыт оҕо» диэн ыстаатыстаах 200-тэн тахса эдэр киһи (кэргэннээх, оҕолоох ыал аҕалара) Анал байыаннай дьайыыга сылдьаллар, 23 саастарын туола иликтэрин быһыытынан, олорор дьиэҕэ төлөбүрү төрүт ыла иликтэр. Ону учуоттаан, тулаайах оҕолор, ол иһигэр, Анал байыаннай дьайыыга кыттыбыт, кыттар тулаайах оҕолор, толору хааччыллыылаах дьиэни ылалларыгар көрүллэр төлөбүрү ылар саастарын намтатар наада буолбут. Онуоха боломуочуйаны эрэгийиэннэргэ бэйэлэригэр биэрэр көдьүүстээх эбит. Сокуоҥҥа маннык уларыйыы киирдэҕинэ, Ийэ дойдуларын көмүскүү сылдьар, «тулаайах уонна төрөппүт көрүүтэ-истиитэ суох хаалбыт оҕо» диэн ыстаатыстаах байыастар олорор дьиэ сэртипикээтинэн туһанар эбэтэр ипотекаларын иэһин сабар кыахтаналлар.
Санааны атастаһыыга Алексей Еремеев Саха Өрөспүүбүлүкэтигэр тулаайах уонна төрөппүт көрүүтэ-истиитэ суох хаалбыт оҕолору олорор дьиэнэн хааччыйыы үлэтин туһунан билиһиннэрдэ.
– Бу хайысханан биһиги сыллата кырата суох харчыны көрөбүт. Быйылгы сылга үбүлээһин тыырылынна эрээри, харчы син биир тиийбэт, эбии 600 мөлүйүөн солкуобай наада. Тулаайах оҕолору, ол иһигэр, Анал байыаннай дьайыыга кыттыбыт, кыттар тулаайах оҕолору, толору хааччыллыылаах олорор дьиэнэн хааччыйыыга көрүллэр төлөбүр эрэгийиэнтэн буолбакка, федеральнай бүддьүөттэн оҥоһуллара наада, оччотугар үлэ быдан суһалсыйыаҕа, – диэтэ.
Боппуруоһу дьүүллэһии түмүгэр, Судаарыстыбаннай Дуума Бэрэссэдээтэлэ Вячеслав Володин аатыгар ыытыллар сурукка парламентарийдар Алексей Еремеев этиитин киллэрдилэр.
Ил Түмэн спикерэ маны таһынан, оскуолаларга мэдиссиинэ үлэһиттэрэ тиийбэттэрин бэлиэтээтэ. Магадан уобалаһын холобуругар олоҕуран, Арассыыйа Федерациятын Аартыкатааҕы зонатыгар эрэгийиэннэри (кинилэр кэккэ территорияларын) киллэрии ырычааҕын тупсарар туһунан эттэ. Бу туһунан Ил Түмэн саайта иһитиннэрэр.
