Ил Түмэн спикерэ Алексей Еремеев мунньах саҕаланыытыгар маннык диэтэ: «Дьон-сэргэ этиитин, санаатын истэ кэллибит. Олохтоох бэйэни салайыныыга федеральнай сокуон ылылынна. Бу сыл бүтүөр диэри бэйэбит сокуоммутун ылыныахтаахпыт уонна олохтоох бэйэни салайыныы систиэмэтин оннугар туруоруохтаахпыт. 2026 сылга ол сокуон чэрчитинэн муниципалитеттар бэйэлэрин устааптарыгар уларытыы киллэриэхтээхтэр. Ити федеральнай сокуоммут бүгүҥҥүтэ 2027 сыл тохсунньу 1 күнүттэн үлэлээн барыахтаах. Онуоха салгыы хайдах үлэлиибит?»
Маны таһынан, былырыын Ил Түмэн тыа хаһаайыстыбатыгар сыһыаннаах сокуон ылбыта. Ол чэрчитинэн, тыа хаһаайыстыбатын сорох боломуочуйалара улуустарга бэриллибитинэн үөскүүр балаһыанньаны олохтоох нэһилиэнньэни кытта Ил Түмэн оробуочай бөлөҕө ырытыахтааҕын Ил Түмэн бэрэссэдээтэлэ эттэ.
«Улуустарга хамсааһын барда. Үгүстэрэ төбөҕө бэриллэр субсидияны кыччатан, үүт субсидиятыгар олоҕурбут сыананы куоһарар төлөбүрү ыла олороллор. Миэстэтигэр тэрээһин үлэтэ, дьону-сэргэни кытта кэпсэтии итинник ыытылла турар. Билигин уратытык дьаһанан икки улуус үлэлии олорор – Мэҥэ Хаҥалас уонна Уус Алдан. Холобур, Мэҥэ Хаҥалас үүт харчытын 102 солк тириэртэ», – диэн Алексей Ильич быһаарда.
Салгыы Ил Түмэн олохтоох салайыныыга сис кэмитиэтин бэрэссэдээтэлэ Владимир Прокопьев иһитиннэрбитинэн, кулун тутар 20 күнүгэр «Аһаҕас былаас биир уопсай тиһигэр олохтоох салайыныыны тэрийии уопсай тосхоллорун туһунан» диэн 33 №-дээх Федеральнай сокуон дойду бэрэсидьиэнэ Владимир Путин илии баттаан бигэргэтэн ылылынна.
«2027 сыл тохсунньу 1 күнүттэн боломуочуйалаах чааһа үлэҕэ киириэхтээх. Ол аата икки түһүмэхтээх. Боломуочуйаттан ураты сүрүн чааһа олоххо киирэн барыахтаах. Федеральнай сокуон РФ субъектарыгар салайыы ханнык мадьыалын талалларыгар быраабы биэрэр – биир таһымнаах систиэмэҕэ толору көһүү, билигин баар икки таһымнаах систиэмэни оннунан хаалларыы, эбэтэр булкаас мадьыалы талыы, ол, биллэн турар, үчүгэй түгэн», – диэн Ил Түмэн сис кэмитиэтин бэрэссэдээтэлэ быһаарда.
Аһаҕас былаас биир уопсай тиһигэр олохтоох салайыныыны тэрийии сокуонун туһунан салгыы манна аах.
Владимир Михайлович дакылаатын кэнниттэн нэһилиэк баһылыктара, тыа хаһаайыстыбатын кэпэрэтииптэрин уонна бааһынай хаһаайыстыбаларын салайааччылара, бу салаа исписсэлиистэрэ бэйэлэрин ыйытыыларын биэрдилэр. Ол курдук, тыа сиригэр баһылык быыбарын, быыбарга турар хандьыдаат тургутук ааһыытын, кликра уонна ыт сокуонун туһунан чопчуластылар.
Салгыы Ил Түмэн тыа сиригэр уонна аграрнай бэлиитикэҕэ сис кэмитиэт бэрэссэдээтэлэ Александр Атласов тыа хаһаайыстыбатыгар киирбит уларыйыылары кэпсээтэ.
Ил Түмэн пресс-сулууспата
Василий Кононов хаартыскаҕа түһэрдэ
This post was published on 09.04.2025 17:01 17:01