СӨ Ил Түмэн Бэрэссэдээтэлэ Александр Жирков олунньу 2 күнүгэр Москва куорат Думатын спикерэ Алексей Шапошниковы кытта көрүстэ.
Көрсүһүү Саха Өрөспүүбүлүкэтин Ил Түмэнин уонна Москва куорат Думатын икки ардыгар 2016 cыл сэтинньитигэр түһэрсиллибит бииргэ үлэлээһин туһунан сөбүлэһии чэрчитинэн буолла. Спикердэр быйыл сэтинньигэ Москваҕа ыытыллар Саха Өрөспүүбүлүкэтин күннэригэр бэлэмнэнии тэрээһин боппуруостарын дьүүллэстилэр. Саха Өрөспүүбүлүкэтин күннэрин кэмигэр Ил Түмэн делегацията Москва куорат Думатыгар сылдьыаҕа. Москва парламенын дьокутааттара программаҕа киирбит официальнай көрсүһүүлэргэ, “төгүрүк остуолларга”, быыстапкаларга кыттыахтара.
Москва куоракка Саха сирин култууратын, искусствотын уонна литературатын күннэрэ аан бастаан 1957 сыллаахха буолбуттара. Саха сириттэн бастакы улахан делегация кыттыылаах тэрээһин дойду тэбэр сүрэҕэр ыытыллыбыта быйыл 60 сылын туолар.
Салгыы Александр Жирков Москва куорат Думатын бэрэссэдээтэлигэр саха норуотун чулуу уола, биллиилээх судаарыстыбаннай, политическай деятель Максим Аммосов аатын Москва куоракка үйэтитии туһунан боппуруоһу көтөхтө. Быйыл Саха Өрөспүүбүлүкэтин уонна Кыргызстан судаарыстыбаннаһын төрүттэспит Максим Аммосов төрөөбүтэ 120 сыла киэҥник бэлиэтэнэр. Максим Кирович Кыргызстаҥҥа ССКП КК бастакы сэкиритээринэн үлэлии сылдьан 1937 сыллаахха репрессияҕа түбэспитэ, 1938 cыллаахха Москва таһыгар Коммунарка диэн сиргэ ытыллыбыта. Максим Кирович кыыһа Л.М.Аммосова көрдөһүүтүнэн Александр Жирков 2014 с. Максим Аммосов Москваҕа ССКП КК инструкторынан үлэлиир кэмигэр 1928-1932 сс. олорбут Манежнай уулусса 9 №-дээх дьиэтигэр өйдөбүнньүк дуосканы туруорарга этии киллэрбитэ. Ити этии 2016 сыл сэтинньигэ Саха Өрөспүүбүлүкэтин парламена уонна Москва куора Думата сокуону оҥорууга бииргэ үллээһин туһунан сөбүлэһии түһэрсэллэригэр эмиэ көтөҕүллүбүтэ. Москва Думатын Бэрэссэдээтэлэ Алексей Шапошников бу боппуруос быһаарыллыытын өйүөх, көмөлөһүөх буолла.
Спикердэр Россия Федерациятын Судаарыстыбаннай Думатыгар киллэрэр сокуоннары көҕүлээһиҥҥэ бииргэ үлэни күүһүрдэргэ сөбүлэстилэр. Александр Жирков уонна Алексей Шапошников икки субъекка ылыллыбыт Экологическай доктриналар олоххо киириилэрин дьүүллэстилэр. Саха Өрөспүүбүлүкэтигэр маннык докумуону Ил Түмэн оҥорон, ааспыт сыл бүтүүтүгэр бигэргэппитэ. Москва Экологическай доктринаны 2005 сыллаахха Россияҕа бастакынан уонна соторутааҥҥа диэри соҕотоҕун ылыммыт субъегынан буолар.
Россия Федерациятын икки субъегын парламеннарын бииргэ үлэлээһиннэрэ 1998 сылтан саҕаламмыта. Москва куорат Думатын делегацията Саха сиригэр 1999 cыл бэс ыйыгар ыалдьыттаабыта. Ил Түмэн дьокутааттара Москва куорат Думатыгар Саха Өрөспүүбүлүкэтин күннэрин кэмигэр 2002 сыллаахха алтынньыга, ол кэнниттэн 2007 уонна 2016 сс. сылдьыбыттара.
Ил Түмэн уонна Москва Думата салгыы сөбүлэһии түһэрсиилэрэ парламеннар икки ардыларыгар сибээһи бөҕөргөтүүгэ көдьүүстээх буолуоҕа, хардарыта бииргэ үлэлиир кыаҕы саҥа таһымҥа таһаарыаҕа диэн спикердэр биир санаалаахтарын бэлиэтээтилэр.
