“Модун” успуорт уораҕайыгар кулун тутар 15 күнүгэр «Мас уустарын тойуга» III Өрөспүүбүлүкэтээҕи бэстибээл-күрэх түмүктэннэ. Мас уустара чороон, саха ох саатын, кылыһах-кырыымпа оҥоруутугар кииристилэр, суруйда Саха парламент саайт.
Бэстибээл-күрэх иитинэн оҥоһуллубут бастыҥ үнүстүрүөмүөннэр, иһиттэр Олоҥхо ыһыаҕа ыытыллар Кэбээйи улууһугар тириэрдиллиэхтэрэ.
Быйылгы бэстибээл-күрэх уратыта, оскуола үөрэнээччилэрэ кыттыыны ылбыттара буолла. Ол курдук, Мэҥэ Хаҥалас Е.П.Шестаков – Эрчимэн аатынан Бырама орто оскуолатын 8-с кылааһын үөрэнээччитэ Мичил Попов учууталынаан Любовь Нестерованы кытары кытынна.
Любовь Васильевна сэһэргииринэн, бу кинилэр бастакы холонуулара:
— Өрөспүүбүлүкэ таһымнаах күрэххэ кыттарбытыттан олус долгуйбуппут. Биллиилээх мас уустарын, маастардары кытары биир былаһааккаҕа оҕолор кытталлара улахан эппиэтинэс, уопут атастаһыы, дьону-сэргэни, оҥоһуктары кытары билсии буолар. Манна кыттарбытыгар чорооммут заготовкатын илдьэ кэлбиппит, миэстэтигэр оһуор түһэрдибит, — диэн кэпсээтэ.
Ил Түмэн бэрэссэдээтэлин маҥнайгы солбуйааччы Александр Жирков үс көрүҥҥэ кыттыыныы ылбыт оҕолорго бэйэтин аатыттан өйдөбүнньүк бэлэхтэри туттарда.
— Икки күннээх бэстибээл-күрэх түмүгүнэн күрэхтэһиигэ кыттыбыт оҕолору бэлиэтиирбин баалаамаҥ. Чороон, саха ох саатын, кылыһах-кырыымпа оҥоруутугар кыттыбыт үстүү оҕоҕо өйдөбүнньүк бэлэх туттарабын. Оҕолор – биһиги кэскилбит. Кинилэргэ маастардар норуоппут дьарыгын, сатабылын хаалларыах тустааххыт, — диэн туран «XVII-XХ үйэ саҕаланыыта Саха Сирин норуоттарын материальнай уонна духуобунай култуурата аан дойду түмэллэригэр» диэн кинигэлэри туттарда.
Кини билиһиннэрбитинэн, кинигэ тахсыытыгар аан дойду 16 түмэлигэр үлэ барбыт, харайылла сытар 5300 араас оҥоһук хаартыскаланан, суруллан саҥа каталокка киирбит.
Түмүккэ санатан эттэххэ кулун тутар 14-15 күннэригэр ыытыллыбыт «Мас уустарын тойуга» III Өрөспүүбүлүкэтээҕи бэстибээл-күрэх Саха Сиригэр Култуура сылыгар уонна Арассыыйа, Саха Сирин норуотун маастара, «Саха Өрөспүүблүкэтин култууратын үтүөлээх үлэһитэ», П.А. Ойуунускай аатынан Судаарыстыбаннай бириэмийэ лауреата, Таатта улууһун Бочуоттаах гражданина Эрнест Александрович Алексеев төрөөбүтэ 80 сылыгар ананна.
