3 От ыйа 03.07
  • -7°
  • $ 104,68
  • 115,6

Александр Игнатьев аатынан спартакиада Нам улууһун спортсменнарын түмтэ

15:01, 29 апреля
Текст:

Намнар биир дойдулаахпыт Александр Игнатьев спорт эйгэтигэр уһун сыллар усталарыгар республикаҕа эрэ буолбакка, Россия таһымыгар күүстээх үлэтинэн биллибит туруу киһи этэ. Кини аата-суола бэрт элбэҕи кэпсиир – Российскай Федерация физическай культуратын туйгуна, РФ сүрүн үөрэҕириитин бочуоттаах үлэһитэ, Саха Республикатын физическай культураҕа бочуоттаах үлэһитэ, СР үөрэҕириитин туйгуна, Нам улууһун бочуоттаах олохтооҕо. Кини сырдык аатыгар анаммыт спартакиада иккис төгүлүн ыытылынна.

Намҥа бу саас муус устар ыйга Александр Игнатьев кэриэһигэр ыытыллар спартакиада иккис төгүлүн буолан ааста. «Спартакиада сүрүн сыала-соруга бастыҥ киһибит Александр Игнатьев аатын үйэтитии уонна Чаҕылхай Махсыым Аммосов үбүлүөйдээх сылын чэрчитинэн ыытылынна», – диир спорт управлениетын салайааччытын солбуйааччы Сергей Софронов.

Күрэхтэһиини тэрийиигэ республикатааҕы Олимпийскай эрэллэр Оҕо спортивнай оскуолатын директора Семен Ядрихинскай, Намнааҕы бастакы нүөмэрдээх оскуола директора Николай Парников уонна Намнааҕы педколледж салайааччыта Елена Никитина улахан кылааттарын киллэрдилэр. Култуура управлениета, Шестаков аатынан кулууб директора Николай Жирков күрэхтэһии үрдүк таһымҥа ыытылларыгар үлэлэспиттэрин бэлиэтиибит. Олус ис суолталаах дьаһалга кыттыбыттарга спорт управлениетын коллектива махталын этэр. «Юрий Балаганскай салайааччылаах биэс көрүҥҥэ сиэрдээхтик судьуйалаабыт Айсен Касьяновы, Владимир Эверстовы, Сардаана Сивцеваны, Руслан Захаровы, Айыына, Айсен Жерготовтары кытта инникитин да үлэлэһиэхпитигэр эрэнэбит. Түгэнинэн туһанан, күрэхтэһиилэр кэмнэригэр спортивнай киин дьиэтин куруук ыраастык туппут, тутар үлэһиттэргэ күүстээх барҕа махтал тылларын аныыбыт», – диир спорт үлэһитэ Софронов.

Хамаандалар олохтоохтук тэринэн кэлбиттэрэ харахха тута көстөр. Кыра нэһилиэктэр урут биирдиилээн көрүҥнэргэ кыттар эбит буоллахтарына, быйыл спартакиадаҕа толору састааптаах кэлэн, илин-кэлин түһүспүттэрэ хайҕаллааҕын спорт управлениета иһитиннэрэр. Бэлиэтээн эттэххэ, «Манчаары оонньуулара» ыытыллар сылыгар, Александр Игнатьев биэс көрүҥнээх I спартакиадатыгар оҕолор эмиэ кыттыбыттара. Билиҥҥи II спартакиада уратыта, атах оонньуутун төрүт ох саанан ытыы солбуйда.

«Быйыл тоҕо ох саа киирдэ диэн ыйытыы үөскүөн сөп. Александр Афанасьевич үлэлиир сылларыгар, улууска төрүт ох саанан ытыыга тренер үлэтин миэстэтэ көрүллүбүтэ. Сыһыары туттахха, Намҥа ох сааны сайыннарарга кылаатын киллэрбит, көрүҥ киэҥник тарҕанарыгар күүһүн уурбут Дандар Дансарановы Бурятияттан Александр Игнатьев аҕалбыта. Саахыматы этэр эбит буоллахха, Александр бэйэтэ сөбүлээн оонньуура. «Саахымат киһини толкуйдатар буолан, атын көрүҥнэргэ олус туһалаах буолуоҕа» диирэ. Ол курдук, бэйэтэ стратег киһи спорт эйгэтигэр саахымат хаамыытынан толкуйдуура, эрдэттэн көрөн быһаарыныы, түмүк оҥороро. Өссө да үгүс сөбүлүүр, дьарыктанар көрүҥнэриттэн остуол тенниһин, волейболу таларга быһаарыммыппыт. Ону тэҥэ, быйыл Бороҕоҥҥо VIII спартакиада буоларынан, олимпийскай көрүҥнэртэн буулдьанан ытыыны киллэрдибит», – диэн быһаарар Сергей Анатольевич.

Биэс көрүҥ түмүгүнэн, бастакы бөлөххө Ленскэй нэһилиэгэ бастыҥ, онтон бириистээх миэстэлэргэ Хатыҥ Арыы уонна Хамаҕатта олохтоохторо таҕыстылар. Остуол тенниһигэр хатыҥ арыылар былырыын 9 миэстэ буолбут эбит буоллахтарына, быйыл 3-с миэстэҕэ тахсаннар, уопсай түмүккэ намнартан икки эрэ баалынан хааллылар.

Иккис бөлөххө, 2 хомустаахтар партизаннары биир баалынан сабырыйан, бастакы үктэлгэ таҕыстылар. Бу сырыыга Партизан буулдьанан ытыыга биллэрдик өрө охсуммут.

Кыра нэһилиэктэргэ Түбэ, иккискэ Арбын уонна үһүскэ Фрунзе нэһилиэктэрэ инники таҕыстылар. Былырыыҥҥынан көрдөххө, кыайыылаах Арбын, иккис Түбэ, үһүс Салбаҥ эбиттэр. Дьэ, бу мантан көстөр хамаандалар түмсүбүттэрэ, хомуммуттара.

Улууска сүүрүүлээх-көтүүлээх өрө тутуллар оонньуулартан, волейболга «Сардаана» кафе, «Папина кухня» тэрилтэлэртэн анал ааттар олохтоммутар. Оттон спартакиада саамай аҕа саастаах кыттааччы анал ааты 1941 сыллаах төрүөх Хамаҕаттаттан Егор Леонтьев ылбыт. Кини спортка өрүүтүн баарын уонна нэһилиэгин куруук дуобакка, саахымакка көмүскүүрүн Сергей Софронов хайгыыр.

«Куруук көмө буолар дьоммутун ааттыахпын баҕарабын. Александр Игнатьев олоҕун аргыһа Маргарита Игнатьева күрэхтэһиини тэрийэргэ хара ааныттан бары өттүнэн көмөлөстө. Миэстэлэспит хамаандаларга сүрүн бириистэри РФ физическай культуратын туйгуна Александр Афанасьевич бииргэ үлэлээбит доҕотторо туруордулар: Семен Ядрихинскай, Степан Павлов, Роман Дмитриев аатынан Олимпийскай эрэллэр директора Семен Чердонов, Николай Алексеев, Василий Петров, Михаил Пахомов. Ону тэҥэ, уруккуттан көмөлөһөр кылааһынньыктара – Николай Мохначевскай, Евгений Ожихо, Андрей Архипов эмиэ бэйэлэрэ анал бириистэрин туруордулар. Үтүө дьыалаҕа НВК “Саха” генеральнай директора Олег Марков, генеральнай продюсер Ньургун Торговкин кыттыһан күүскэ көмөлөстүлэр. Үөрүүгэ кыттыһан өссө спортка сыһыаннаах бириистэри Чурапчытааҕы физкультурнай институт директора Иннокентий Готовцев, Намнааҕы коммунтеплоэнерго салайааччыта Николай Игнатьев, Николай Дьяконов, Владимир Куприянов, Филипп Пестряков туруордулар.

Хаһааҥҥытааҕар да бары өттүттэн көмө туттубут. Ол курдук, нэһилиэк аҕа баһылыктара спартакиадаҕа төһүү күүс буоллулар. Нам улууһун дьаһалтатын, Ленскэй нэһилиэк, Хамаҕатта, 1 Хомустаах, Хатырык, 2 Хомустаах, Маймаҕа, Искра, Фрунзе аҕа баһылыктарыгар спорт управлениетын аатыттан махталбытын тиэрдэбит», – диэн түмүктүүр Сергей Софронов.

Ааптар: Харысхан Попов, Нам улууһа

Следите за самым важным и интересным в Telegram-канале и WhatsApp-группе ЯСИА
0
0