Дойду тренердэрин штаба быһаарбытынан, көҥүл тустууктар Виктор Лебедев уонна Дагестанец Исмаил Мусукаев Польшаҕа ыытыллар «Мемориал Вацлава» аан дойдутааҕы таһымнаах турнирга күөн көрсүөхтэрэ. Лебедев чугас доҕоро, Саха сиригэр бодибилдинг федерациятын президенэ Александр Гренадеров СИА-ҕа эппитинэн, Виктор Лебедев элбэх мөккөрү, араллааны таһаарбыт күрэстэһиини толуйар санаалаах.
Биллэрин курдук, Россия чемпионатыгар Виктор Лебедев кыайбыта. Судуйа быһаарыытын утарбыт Исмаил Мусукаев саха бөҕөһүн анньыалаан, охсуһууну күөртээбитэ. Ити кэнниттэн Дагестан спортсменнара турнирга кыттартан аккаастаммыттара. Кинилэр быһаарылыырыгар бэл, Рамазан Абдулатипов этиитэ дьайбатаҕа.
Россия тренердэрин штабын быһаарыытынан Лебедев уонна Мусукаев Вацлава Циолковски сырдык кэриэһигэр анаан ыытыллар норуоттар икки ардыларынааҕы XXIV-с турнирга 57 кг диэри ыйааһын сайаапкатыгар киирдилэр. Турнир бэс ыйын 17-19 күннэригэр ыытыллыаҕа.
«Виктор буолаары турар турнирга дьаныардаахтык киирсэр санаалаах. Кини байыас, оттон хас биирдии байыас кыайар сыаллаах-соруктаах», —диир Александр Гренадеров.
Саха бөҕөһө суруналыыстарга эппитинэн, видео хатылааһын көрдөрбүтүнэн, кини Мусукаевы кытта күөн көрсүүгэ хотторбут.
Виктор Лебедев билигин хамаандатын кытта Адлерга баар.
