20 От ыйа 20.07
  • 17°
  • $ 88,02
  • 96,04

Александр Борисов сэрии бэтэрээнигэр Ил Дархан бэлэҕин туттарда

18:04, 09 мая 2018
Текст:
Читайте нас на
Яндекс Новости
ЯДВ

Улуу Кыайыы өрөгөйдөөх күнүн көрсө СӨ сибээһин  уонна информационнай технологиятын миниистирэ Александр Борисов   сэрии бэтэрээнин Михаил Жиркову эҕэрдэлээн туран, Ил Дархан бэлэҕин туттарда.


«Аҕа дойдубутун көмүскүүргэ Сахабыт сириттэн 60 тыһ. киһи кыттыбыта, кинилэртэн аҥаардара дьиэлэригэр төннүбэтэҕэ. Киһи аймаҕы быыһаабыт, харах уулаах, хаан тохтуулаах Улуу Кыайыы күнэ хаһан даҕаны дьон-сэргэ өйүгэр-санаатыгар өлбөөдүйүө суоҕа. Өбүгэлэрбит хорсун быһыыларын сиэннэрбитигэр куруук кэпсии сылдьыахпыт. Сырдык тыыннарын толук уурбут саллааттары кэриэстээн, үтүө өйдөбүнньүк быһыытынан «Өлбөт үйэлээх полкаҕа» хаамсыахпыт», — диэн Ил Дархан эҕэрдэтигэр сурулла сылдьар.

Михаил Романович 1924 с. ахсынньы 31 күнүгэр Бүлүү куоратыгар пуочта үлэһитин дьиэ кэргэнигэр төрөөбүтэ. 1943 с. Бүлүү педучилищетын бүтэрэн, армияҕа ыҥырыллан барбыта. 1945 с. диэри кавалериһынан сулууспалаабыта.

«Мин оччолорго физика уонна математика учуутала этим. Миигин Монголияҕа ыыппыттара, биһиги арҕаа фрону атынан хааччыйарга үлэлээбиппит. Дьиикэй аттары тутан ылан, ыҥыырдаан, сорудаҕы толорорго үөрэтэн, Сэбиэскэй армия кэккэтигэр ыытарбыт», — диэн саныыр бэтэрээн.

Сэрии кэнниттэн Михаил Романович кэргэнин, уруккута нуучча тылын учуутала, быйыл 91 хаарын уулларбыт Анна Степановнаны кытта олохторун педагогическай үлэҕэ анаатылар. Бүлүүгэ, Ленскэй оройуонугар, Дьокуускайга биир оскуолаҕа үлэлээн, сүүс сүүстэриттэн өйөнсөн, 66 сыл бииргэ олороллор. Сахабыт сирин киин куоратыгар сиэннэрэ улааттылар.

Бэтэрээни кытта көрсүһүү кэмигэр миниистир Александр Борисов сэрии сылларыгар эйэлээх олоҕу уһансыбыт, бэйэтин кылаатын киллэрбит буойуҥҥа махтанан туран, Жирковтар дьиэ кэргэттэригэр чэгиэн доруобуйаны, дьоллоох уһун олоҕу баҕарда.

Марианна Тыртыкова, «Саха сирэ», edersaas.ru

Следите за самым важным и интересным в Telegram-канале и WhatsApp-группе ЯСИА