Быйыл сайын мас оннугар саҥа тимир муостаны тутуохтара. Үөһээ Кураанах үрэх нөҥүө саҥа муоста Алдан оройуонугар куораттыы тииптээх Ленинскэй бөһүөлэгин икки микрооройуонун холбуоҕа.
“Бүгүн мас муостабыт мөлтөх туруктаах. Өрөмүөн диэн саҥа бэрэбинэлэри тэлгээччибит. Муус хамсаатаҕына, муостаны сүргэйиэ уонна бөһүөлэк сорох чааһа быстан хаалыан сөп. Ол иһин уопсай мунньахха саҥа муостаны тутууну талбыппыт”, — диэн СИА-ҕа олохтоох дьаһалта баһылыга Светлана Гордиенко иһитиннэрдэ.
“Доруобуйа дьиэтэ” өрөмүөннэниэ
Өрөспүүбүлүкэ бүддьүөтүттэн өссө биир өйөбүлү ылбыт бырайыак – Лебединай бөһүөлэккэ “Доруобуйа дьиэтин” үрдүн өрөмүөннээһин. Манна Алданнааҕы ДЮСШ филиала баар, онно хайыһардьыттар бэлэмнэнэллэр.
Бу икки бырайыагы олоххо киллэрэргэ өрөспүүбүлүкэ бүддьүөтүттэн 2 мөл солкуобай субсидия бэриллиэҕэ. Кыттыгас үбүлээһин быһыытынан 200 тыһ солк олохтоох бүддьүөккэ көрүлүннэ.
Руслан Басыгысов, СИА.
