Докучаевскай оҕолоро кыһыл көмүстээх Алдан устунан айаннаатылар. Донецкай Народнай Өрөспүүбүлүкэ оҕолоро Алдан оройуонун ыҥырыытынан сааскы каникулларын Саха сиригэр атаардылар, ол туһунан регион салалтатын пресс-сулууспата иһитиннэрдэ.
Делегацияҕа уон оҕо баар.
«Хайыһарынан, хаар көлөнөн, табанан айаннаатылар, кыһыл көмүс хостуур тэрилтэҕэ экскурсиялаатылар, Хатыстыырга таба ыстаадатыгар сырыттылар, «Юнармия» кыттыылаахтарын кытта кэпсэттилэр», – диэтэ Алдан оройуонун баһылыга Александр Шестопалов.
Докучаевскай оҕолоругар сахалыы уонна эбэҥкилии ойуулаах кыһыҥҥы таҥас бэрилиннэ.
Александр Шестопалов эппитинэн, айан сайын эмиэ салҕаныаҕа, Нерюнгрига буолар Олоҥхо ыһыаҕар ыҥырдылар.
This post was published on 31.03.2025 14:54 14:54