Алдаҥҥа буолар бүтүн Арассыыйатааҕы хайыһар күрэҕэр Олимпийскай чемпион, Арассыыйа спордун үтүөлээх маастара Никита Крюков кыттыаҕа. Кини Саха сиригэр алтынньы 27 күнүгэр хайыһар спордун норуоттар икки ардыларынааҕы федерациятын официальнай бэрэстэбиитэллэрин кытары кэллэ, диэн СИА кэпсиир.
Алдаҥҥа буолар хайыһар күрэхтэһиитэ дойду спортсменнарыгар кыһыҥҥы сезону аһыаҕа. Олохтоох хайыһар-биатон комплекса үөрэтэр-эрчийэр түмсүүлэргэ уонна күрэхтэһиилэргэ бары өттүнэн сөп түбэһэр.
Күрэхтэһиигэ Арассыыйа биэс федеральнай уокуругун бэрэстэбиитэллэрэ кыттыыны ылыахтара. Алдаҥҥа Пекиннээҕи Олимпиада үс төгүллээх призера, биатлонист Эдуард Латыпов эрчиллэ сылдьар. Аатырбыт хайыһардьыттар Илья Семенов, Андрей Мельниченко уо. д. а. кыттыахтара.
