Бу күннэргэ, “Алаҕар нэһилиэгэ” тыа сирин түөлбэтин дьаһалтатыгар, чуолаан баһылык Иван Иванович кабинетыгар, чугаһынан олорор Гоголевтарга, Лыткиннарга да киирэ сырыттахха бука бары саҥа хотон тутуллан, үлэҕэ киирэрин эрэ туһунан сонуннаахтар, суруйда Сэмэн Жендринскэй, Саҥа олох хаһыат.
Урукку сылларга, үөрэххэр кыһаллыбат буоллаххына дьонуҥ “хотоҥҥо, сүөһү кутуругун маныы барыаҥ” диэн куттуур эбит буоллахтарына, билигин төттөрүтүн тыа хаһаайыстыбатын салаатынан дьарыктанар дьоҥҥо талаһар, сорох ардыгар ордук да саныыр кэмнэр үөскүүр буоллулар эбээт. Бэл, диэтэр ааспыкка, Кытаанах нэһилиэгэр ыытыллыбыт тыа сирин форумугар сырыттахпытына, Төлөй нэһилиэгэр түргэнник ситэр салаанан дьарыктанар ыаллар бу сайын 30-ча индюгу ыкка туттарбыттарын истэн, о.э харчытынан таһаардахха 1 мөлүйүөн кэриҥэ сууманы “сүтэрбитин” туһунан истэммит, бары даҕаны улаханнык хараастан ылбыппыт.
Оттон бүгүн, сэтинньи 21 күнүгэр, Алаҕар нэһилиэгэр тыа хаһаайыстыбатын бырааһынньыгынын чэрчитинэн, кэскиллээх фермер Гаврил Попов баһылыктаах бааһынай хаһаайыстыба 100 төбөҕө анаммыт улахан, сабыс-саҥа хотоно үлэҕэ киирбитин үөрүүлээх арыллыыта буолла диэн нэһилиэк дьокутаата Афанасий Гоголев иһитиннэрдэ.
Үөрүүлээх чааска улуус дьокутааттарын Сэбиэтин бэрэстээтэлэ Яков Оконешников, улуус тыатын хаһаайыстыбатын управлениетын начаалынньыгын солбуйааччы Айсен Толстоухов, “Алаҕар нэһилиэгэ” тыа сирин түөлбэтин баһылыга Иван Оконешников кыттыыны ыллылар.
“Тыа сиригэр олохпут сайдарын туһугар — тыа хаһаайыстыбатын өрө тутан, уйгулаах олоҕу оҥостуохтаахпыт. Саҥа хотон тутуута биһиги Чыаппарабытыгар тыа хаһаайыстыбата өссө эбии сайдарыгар кэскиллээх дьыала. Бэйэ оҥорон таһаарар бородууксуйата доруобуйаҕа туһалааҕа билиҥҥи үйэҕэ толору дакаастанна. Кэнники сылларга кыра нэһилиэктэртэн үлэлиир миэстэ суоҕунан ыччат тыа сиригэр олохсуйбат буолуутугар тириэртэ. Нэһилиэк дьаһалтата биир улахан сыалынан үлэ миэстэтин таһаарыы, дьону олохсутуу буолар. Итиннэ барытыгар төһүү күүс буолуохтаахпыт”, — диэн саҥа хотон хаһаайына Гаврил Гаврильевич санаатын үллэһиннэ.
This post was published on 21.11.2025 16:13 16:13