Туймаада быйылгы Ыһыаҕар кымыс «Айыы аһа» норуоттар икки ардыларынааҕы II фестивалыгар Россия, Монголия, Татарстан, о.д.а. дойдулартан уопсайа 17 хамаанда кытынна.
«Кымыс хаачыстыбата тубуста, кыттааччалар ахсааннара быйыл элбээтэ. Омук доруобуйата чэгиэн буоларыгар бу фестивал улахан олугу уурар», — диэн СИА-ҕа Дьокуускай куорат баһылыга Айсен Николаев эттэ.
Казахстантан кэлбит ыалдьыттар куорат мээригэр омуктарын баһылыгын – хан таҥаһын бэлэхтээтилэр. «Монголия кымыһа аан дойдуга албан аатырар, суон сураҕырар. Саха кымыһа биһиэнин кытта тэҥнээтэххэ, аһыы амтаннаах. Ол эрээри, кымыс – Айыы аһа олус минньигэс, инникитин да оннук буола туруоҕа», — диэтэ Монголия – Саха сирэ эргимтэтин президенэ Амаржагал.
Оренбургтан кэлбит ыалдьыттар Ыһыах кэрэ көстүүтүн, урукку үгэс сүппэтэҕин, симэлийбэтэҕин сөҕөллөрүн эттилэр.
«Мин санаабар, Россия бүтүннүүтэ сахалар Ыһыахтарыгар сылдьыахтаах, хайаатар да эһиги кымыскытын амсайыахтаах», — диэн Оренбург уобалаһын бэрэстэбиитэлэ Людмила Ушукаева эттэ.
Кымыс фестивалыгар бүлүүлэр оҥорбут кымыстара бастыҥынан ааттанна. Оттон иккис миэстэни мэҥэлэр, үсүһү чурапчылар ыллылар.
