Өрөспүүбүлүкэтээҕи коррекционнай оскуола-интэринээт 9 кылааһын үөрэнээччитэ Айыллаана Степанова «Үрүҥ торуоска» диэн көрбөт оҕолор норуоттар ыккардыларынааҕы фестивалларыгар кыттыыны ылла.
Быйылгы фестивалы «Русская песня» тыйаатыр ыытта. Кыттыылаахтары дойду бэрэсидьиэнэ Владимир Путин эҕэрдэлээтэ. Кини эҕэрдэ телеграмматыгар фестиваль оҕолор баҕа санааларын толорор диэбит.
Айыллаана Арассыыйа үтүөлээх артыыската Анита Цойу кытары «Неисправимая» диэн ырыаны ыллаата.
«Үрүҥ торуоска» фестиваль хараҕынан көрбөттөр аан дойдутааҕы күннэригэр ананан ыытылынна. Аһымал фестиваль көрбөт оҕолору айымньы нөҥүө өйүүр суолталаах. Фестивальга оҕолор биир сыанаҕа дойду биллэр киинэ, эстрада, тыйаатыр, спорт, политика дьонун кытары гала-концертка ыллыыллар.
Айыллаана биэс саастааҕар сольнай кэнсиэрин ыытан турар. 2015 сыллаахха иккис кэнсиэрин тэрийбитэ, дискэ таһаарбыта. Икки сыл буолан баран Рома Винокуров, Мичил Моисеев буоланнар «Мин көрөбүн сүрэхпинэн» диэн ырыаҕа клиптара үгүс дьону долгуппута. Былырыын сэтинньигэ үһүс сольнай кэнсиэрин биэрбитэ. Айыллаананы биир дойдулаахтара сөбүлээн истэллэр, кини талааныгар сүгүрүйэллэр. Араас таһымнаах фестиваллар кыайыылаахтара.
This post was published on 15.10.2020 11:04 11:04