Кулун тутар 30 күнүгэр режиссер Степан Бурнашев устубут «Айта», киинэтэ быракаакка таҕыспыта. Уонна бастакы өрөбүллэргэ 7,8 мөл. солк. хомуйан историяҕа саамай кассовай киинэнэн буолла. Оттон премьера саҕаланыаҕыттан 9,7 мөл. солк. тахса суума оҥоһулунна.
«Кинопоиск» онлайн-кинотеатрга киинэ рейтиҥэ 7,3 баалы ылла. Бу эмиэ саха киинэтин ортотугар рекорд буолар. Манна куолаһы сүрүннээн Арассыыйа киин чааһын олохтоохторо биэрэллэр.
«Киинэни Санкт-Петербург, Москва, Новосибирскай, Екатеринбург куораттарга көрдөрдүбүт. Саалалар бары кэриэтэ көрөөччүлэринэн туолбуттарын сөхтүм. Бу режиссер киһиэхэ дьиҥнээх дьол этэ, маннык буолуо диэн санаан көрбөт этим», — диэн режиссёр Степан Бурнашев санаатын үллэстэр.
«Айта» киинэ туһунан социальнай ситимҥэ элбэх блогер суруйбута, маассабай прокатка тахсыан инниттэн киһи интэриэһин таппыта. Онон ааспыт өрөбүлгэ хайаан да сылдьарга соруммуппут. Саала толору киһи этэ, чахчытын даҕаны, кэлиҥҥи сылларга саха киинэтигэр мин көрдөхпүнэ, дьон быдан сөбүлээн сылдьар. Киинэ үчүгэйдик уһуллубут, артыыстар оонньуулара киһини итэҕитэр уонна сөхтөрөр. Ол эрээри, киинэ тугунан түмүктэнэрин тута сэрэйбитим. Баҕар бэйэм араас элбэх киинэни көрө үөрэммит буоланмын буолуо. Биирдэ көрүөххэ сөп диэн сыаналыыбын», — диэн Дьокуускай куорат олохтооҕо Туйаара Жиркова санаатын эттэ.
«Мин санаабыр, кэнники тахсыбыт саха киинэлэртэн, «Айта» таһыма биллэ үрдүк. Олус сөбүлээтим, билэр дьоммор барыларыгар сүбэлээтим. Киинэ киһини толкуйдатар диэххэ сөп. Олоххо араас буолар буолаҕа, мин сүрүн дьоруойдары кытары тэҥинэн долгуйдум, абардым хараҕым да уута кэлбитин билбэккэ хааллым. Артыыстар баҕас олох аан дойду артыыстарыттан итэҕэһэ суохтук оонньууллар. Степан Бурнашевка инники үлэлэригэр ситиһиини баҕарабын» , — диэн Наталья Никонова тугу саныырын эттэ.
Киинэ сюжета үрдүкү кылаас үөрэнээччитэ Айта бэйэтигэр тиийиммитин тула хамсыыр. Үчүгэй ыал кыыһа маннык хардыыга мээнэ барбатаҕа чахчы. Буруйдааҕы көрдөөһүн саҕаланар. Уорбалааһыҥҥа полиция үлэһитэ Афоня түбэһэр. Кини аатын оскуола үөрэнээччитэ өлүөн иннинэ суруйбут суругар булуллар. Олохтоох дьоҥҥо кини туора киһи буоларын ыарырҕатар. Эр киһи атын дэриэбинэҕэ атын регионтан хамнастаһаары кэлэ сылдьар. Дьон бу киһини бэйэлэрэ сууттуохтарын баҕараллар, ол эрээри Афоня коллегалара, төһө даҕаны дьону өйдөөтөллөр, эр киһини буруйа дакаастана илик диэн көмүскэһэллэр.
