Саха сирин баһылыга Айсен Николаев «Доруобай уопсастыба – 2026» аан дойдутааҕы форум пленарнай сессиятыгар кыттыыны ылла. Онно уопсастыба доруобуйатын бөҕөргөтүүгэ аан дойду уонна регионнааҕы бастыҥ быраактыкаларын дьүүллэстилэр.
Сессияны Россия доруобуйа харыстабылын миниистирэ Михаил Мурашко салайда. Россия бырабыыталыстыбатын бэрэссэдээтэлин солбуйааччы Татьяна Алексеевна Голикова эҕэрдэлээтэ, оттон дьүүллэһиигэ кэккэ дойдулар доруобуйа харыстабылын салайааччылара уонна Россия регионнарын салалталара кыттыыны ыллылар.
Саха сирин баһылыга Айсен Николаев бүгүн өрөспүүбүлүкэ утумнаахтык ыытар үлэтэ хайыы-үйэ чопчу түмүгү биэрэрин — Саха сиригэр олох уһуна Россия орто таһымыттан үрдүк уонна Уһук Илиҥҥэа саамай үрдүк буоларын бэлиэтээтэ. Бу кэнники сыллар тиһиктээх быһаарыыларын түмүгэ, инфраструктураны сайыннарыы, доруобуйа харыстабылын профилактикатын уонна бастакы звенотын, ону тэҥэ үрдүк технологиялаах медицинскэй көмөнү оҥоруу.
Айсен Николаев сессияҕа хайыы-үйэ көдьүүстээҕин дакаастаабыт быраактыкалары билиһиннэрдэ. Бу сыралаах сэлиэнньэлэр хамсааһыннара, «Мобильнай доктордар» бырайыак, оскуола медицинатын сайдыыта. «Ити барыта — медицинскэй көмө табыгастаах буоларын, дьон-сэргэ уһуннук олорорун туһугар тутуспут биир ситим чаастара», — диэн Саха сирин баһылыга МАХ национальнай мессенджерыгар бэйэтин ханаалыгар иһитиннэриитигэр бэлиэтээтэ.
Россия доруобуйа харыстабылын миниистирэ Михаил Мурашко Саха сиригэр төһө да улахан сири-уоту, аҕыйах нэһилиэнньэтин, транспортнай табыгастаах буолуу уустугун үрдүнэн, дойдуга уопсастыбаннай доруобуйа биир бастыҥ көрдөрүүтүн ситиһэр кыахтааҕын тоһоҕолоон бэлиэтээтэ.
«Федеральнай таһымҥа маннык сыанабыл биһиги талбыт ньымабыт түмүгү биэрэрин бигэргэтэр. Чуолаан общественнай доруобуйаны сайыннарыыга, профилактикаҕа уонна чөл олоҕу сайыннарыыга тиһиктээх үлэ дьон олоҕун хаачыстыбатын, уһунун үрдэтиигэ күлүүс буолар», — диэн Айсен Николаев түмүктээтэ.
This post was published on 17.03.2026 10:03 10:03