Саха сиригэр Өлүөнэ эбэни туоруур муостаны тутарга бэлэм хампаанньалар баалларын биллэрдилэр. 2020 сыл устата инвестордар суоттарыгар бырайыактыыр-сметалыыр докумуон оҥоһуллуохтаах. Ол туһунан Айсен Николаев Юрий Трутневка бырайыагы билиһиннэрэригэр эттэ.
Айсен Николаев 2020 сыл устата федеральнай таһымҥа Өлүөнэ муостатын тутууга анаммыт үбүлээһини тыырыы боппуруостара быһаарылыннаҕына, үлэ саҕаланыахтааҕын эттэ.
Саха сирин былааһа муостаҕа киирии суолун тутууга үс тутулу көрбүтэ. Түмүгэр Старай Табаҕанан биэрэги бөҕөргөтөр дамбаны холбуур киириилээҕи талбыта. Муоста уһуна 3,12 км, киирии суолун уһуна — 10,9 км. Икки балаһалаах, сууккаҕа 5,8 тыһ. массыына сылдьыахтаах.
«Дойду бырабыыталыстыбата муоста тутуутун өйөөтөҕүнэ, бырайыакка кыттар баҕалаах хампаанньалар бааллар. Саха сирин уонна Россия миниистирдэрин кабинеттара сыл устата эбийиэк тутуутун ымпыгын-чымпыгын барытын быһаарыахтаахтар», — диэтэ Ил Дархан.
Өрөспүүбүлүкэ баһылыга муоста тутуута улахан социальнай суолталааҕын бэлиэтээтэ. Саха сирин олохтоохторо өр күүттүлэр. Муоста киирдэҕинэ сылы эргиччи сырыы 20,9%-тан 83%-ҥа диэри эбиллиэхтээх. Хотугу тиэйии-таһыы тэрээһинин ороскуота 4,1 млрд солк кыччыахтаах. Инвестиция 200 млрд солк улаатыахтаах.
