30 Кулун тутар 30.03
  • -15°
  • $ 92,37
  • 99,53

Айсен Николаев: Тапталлаах Сахабыт сирин дьулусхан сайдыыга сирдиигит!

11:58, 08 марта 2022
Текст:
Читайте нас на
Яндекс Новости
ЯДВ

Күндү Далбар хотуттар! Саха Өрөспүүбүлүкэтин салалтатын уонна тус бэйэм ааппыттан эһигини Аан дойду дьахталларын күнүнэн итиитик-истиҥник эҕэрдэлиибин!

Бу орто дойдуга баар кэрэ уонна үтүө эһигини кытта ситимнээх. Дьахталлар былыр-былыргыттан киһи аймаҕы ууһатар-тэнитэр, иэримэ дьиэни иччилиир, уҕараабат тапталы, сылаас сыһыаны бэлэхтиир ураты аналлаахтар.

Саха сирин дьахталлара урут уонна билигин даҕаны олоххо дьулуурдарынан, тулуурдарынан уонна хорсуннарынан аатыраллар. Хоту дойду кэрэ сибэккитин курдук, үтүө санааҕытынан, кэрэҕэ тардыһыыгытынан сырдыкка угуйаҕыт, ситиһиилэргэ, кыайыыга кынаттыыгыт.

Тыйыс айылҕалаах Сахабыт сиригэр дьахтар, ийэ уобараһа сылаас холумтаннаах алаһа дьиэни кытары ыкса ситимнээх. Кини – дьиэ кэргэн туллар тутааҕа, эргийэр киинэ. Биһиги, Саха сирин олохтоохторо, ийэ оҕотун олоҕор уонна дьылҕатыгар эрэ буолбакка, бүтүн уопсастыба сайдыытыгар сүҥкэн сабыдыалын билинэбит. Ол курдук, 2022 сылы мин Саха Өрөспүүбүлүкэтигэр Ийэ сылынан биллэрдим. Онон бу сылга ураты болҕомтобутун, кыһамньыбытын ийэҕэ, дьахтарга аныахпыт.
Аан дойду дьахталларын күнүн көрсө биһиги өрөспүүбүлүкэбитигэр Саха сирин дьахталларын ХV сийиэһэ уонна Уһук Илин дьахталларын форума ыытыллаллар. Бу Ийэ сылыгар уонна Саха АССР 100 сылыгар анаммыт тэрээһиннэр уопсастыба сайдарын туһугар өрөспүүбүлүкэ дьахталларын түмэр сүрүн соруктаахтар.

Ытыктабыллаах Саха сирин дьахталлара!

Эһиги олох бары эйгэтигэр талааҥҥытын арыйан көхтөөхтүк, чаҕылхайдык кыттаҕыт, үлэҕитигэр уонна тус олоххутугар сөҕүмэр түмүктэри ситиһэн, тапталлаах Сахабыт сирин дьулусхан сайдыыга сирдиигит. Хотугу кыраайбыт салгыы сайдарын туһугар дьону-сэргэни көҕүлээн, бэйэҕит куораккытыгар, оройуоҥҥутугар, нэһилиэккитигэр үтүө холобур буолаҕыт.
Өссө төгүл сандал саас бырааһынньыгынан – Аан дойду дьахталларын күнүнэн эҕэрдэлиибин! Чэгиэн туругу, тапталы уонна дьиэ кэргэҥҥитигэр дьолу-соргуну баҕарабын!

Саха Өрөспүүбүлүкэтин Ил Дархана Айсен Николаев

Следите за самым важным и интересным в Telegram-канале и WhatsApp-группе ЯСИА