Айсен Николаев Саха сирин бырабыыталыстыбатын уонна дьаһалтатын салалтатын кытта былааннаах мунньаҕы ыытта. Болҕомто киинигэр — ВЭФ-2025-кэ регион кыттыыта, сүөһү аһылыгын бэлэмнээһин хампаанньата уонна оттук сезонугар бэлэмнэнии.
«Бу нэдиэлэҕэ Илиҥҥи экономическай форум саҕаланар. Кэнники уон сылга Саха Сирэ ВЭФ-ка 225-тэн тахса сөбүлэһии түһэристэ. Инвестиция уопсай кээмэйэ 1 трлн солкуобайтан тахса, 9 тыһыынчаттан тахса үлэ миэстэтэ тэрилиннэ, бөдөҥ инфраструктурнай бырайыактар олоххо киирдилэр. Быйыл 100 млрд солк. тахса суумалаах сөбүлэһиилэргэ илии баттыырга сананныбыт. Саҥа бырайыактар өрөспүүбүлүкэ бигэ сайдыытыгар уонна Саха сирин дьонун олохторун хаачыстыбатын тупсарыыга көмөлөһүөхтэрэ диэн эрэллээхпин», — диэн Айсен Николаев тоһоҕолоон бэлиэтээтэ.
Мунньахха туспа блогунан тыа хаһаайыстыбатын үлэтин хаамыыта көрүлүннэ. Барыллаан иһитиннэриилэринэн, өрөспүүбүлүкэ 394 тыһ. туонна оту бэлэмнээбит, ол былаан 91%-нын ылар. Былырыыҥҥы саппааһы уонна мобильнай биригээдэлэр үлэлэрин учуоттаан, түмүк көрдөрүү 94%-ҥа тиийиэҕэ – ити 410 тыһ. туонна кэриҥэ.
«Бүгүн сүөһү аһылыгын бэлэмнээһиҥҥэ былааны толоруу эрэ буолбакка, тыа хаһаайыстыбатын туруктаах буолуутун бөҕөргөтөр улахан суолталаах. Биһиги аграрийдарбыт уустук усулуобуйаҕа даҕаны, өрөспүүбүлүкэ үрдүк түмүктэри ситиһэр кыахтааҕын көрдөрөллөр», — диэтэ Саха сирин баһылыга.
Сүрүн соруктар ахсааннарыгар — оттук сезонугар бэлэмнэнии. Сүбэ мунньахха иһитиннэрбиттэринэн, хочуолунайдар уонна сылаас ситимнэр 75% кыстыкка бэлэмнэр.
«Ититэр сезоҥҥа бэлэмнэнии — биһиги биир сүрүн приоритетпыт. Биһиги өрөспүүбүлүкэ бары нэһилиэнньэлээх пууннарыгар сылааһы, электроэнергиянан уонна уунан хааччыйыыны тохтоло суох хааччыйыахтаахпыт. Бу үлэни билигин төһө хаачыстыбалаахтык толорорбутуттан кыһынын дьон- сэргэ олоҕун тупсуута, куттала суох буолуута быһаччы тутулуктаах», — диэн Айсен Николаев бэлиэтээтэ.
