Айсен Николаев бэнидиэнньиккэ, от ыйын 3 күнүгэр, Киин быыбардыыр хамыыһыйаҕа Саха сирин баһылыгын дуоһунаһыгар кандидат быһыытынан турунар докумуонун туттарда.
«Долгутуулаах, бэйэбэр хайдахтаах эппиэтинэһи ылан эрэрбин өйдүүбүн. Биэс сыл анараа өттүгэр барыллаан көрбүтүм, билигин — билэбин. Саха сирин олохтоохторугар барыгытыгар төрөөбүт дойдубут сайдарын туһугар миэхэ өрөспүүбүлүкэни салайарбар кыах биэрбиккитигэр, итэҕэйбиккитигэр махтанабын. Иннибитигэр өссө улахан үлэ күүтэр. Бу миигин үөрдэр. Бииргэ, иннибит диэки!» — диэн суруйда Айсен Николаев телеграм-ханаалыгар.
Санаттахха, «Биир ньыгыл Россия» баартыйа бэс ыйыгар Айсен Николаевы Саха сирин баһылыгын дуоһунаһыгар кандидатынан туруорбута. Николаев иккис болдьоххо барар быһаарыытын Россия президенэ Владимир Путин өйөөбүтэ, быыбарга ситиһиини баҕарбыта.
Саха сирин баһылыгар быыбар балаҕан ыйыгар буолуоҕа. Куоластааһын үс күн ыытыллар — балаҕан ыйын 8, 9, 10 күннэригэр.
2018 сыллааҕы быыбарга Айсен Николаев быыбардааччы 71,4% куолаһын ылбыта.
