24 Ыам ыйа 24.05
  • -7°
  • $ 104,68
  • 115,6

Айсен Николаев: Россия устудьуоннарын күнүнэн ис сүрэхпитэн эҕэрдэлиибин!

Ытыктабыллаах устудьуоннар уонна преподавателлэр! Саха Өрөспүүбүлүкэтин салалтатын уонна тус бэйэм ааппыттан эһигини Россия устудьуоннарын күнүнэн ис сүрэхпитэн эҕэрдэлиибин!

Устудьуоннуур сыллар кэрэ кэмнэрэ – бу доҕордоһуу уонна таптал, хорсун холонуулар уонна үтүө саҕалааһыннар. Ордук бу кэрдиис кэмҥэ киһи олоҕун бөҕө акылаата ууруллар: билии уонна сатабыл, ылынар санаа уонна бигэ санаа олохсуйар.

Бүгүн өрөспүүбүлүкэ устудьуоннара талан ылбыт идэлэригэр үөрэнэн, дириҥ билиини сомсоллор, Россиятааҕы уонна норуоттар икки ардыларынааҕы олимпиадаларга, куонкурустарга, күрэхтэһиилэргэ үрдүк көрдөрүүлэри ситиһэллэр. Эдэр дьон айар-тутар бырайыактары олоххо киллэриигэ кытталларын ааһан, ол бырайыактары бэйэлэрэ көҕүлүүллэр, эрэгийиэн, дойду уопсастыбаннай уонна бэлитиичэскэй олоҕор көхтөөхтүк кытталлар. Кинилэр инникитин үтүөкэн исписэлиис буолан төрөөбүт өрөспүүбүлүкэлэрин сайдыытыгар элбэх саҥаны уонна туһалааҕы киллэриэхтэрэ диэн эрэнэбин.

Оттон биһиги сорукпут – бары усулуобуйаны хааччыйыы, талааннарын уонна дьоҕурдарын сайыннаралларыгар өйөбүл буолуу. Саха сиригэр аныгылыы үөрэх эйгэтэ тэрилиннэ, эдэр исписэлиистэри өйүүр тус сыаллаах судаарыстыбаннай бырагыраамалар олоххо киирэллэр. Онон бары бииргэ элбэҕи ситиһиэхпит, өрөспүүбүлүкэбит эрэгийиэни сайыннарыыга дойду үрдүнэн бастыҥнар ахсааннарыгар ааттаныаҕа диэн бигэ эрэллээхпин!

Бу күҥҥэ идэҕэ үөрэтэр орто уонна үрдүк үөрэхтэр тэрилтэлэрин преподавателлэригэр уонна үлэһиттэригэр түргэн тэтиминэн уларыйа турар кэмҥэ эрэгийиэн экэниэмикэтигэр уонна социальнай эйгэтигэр үрдүк таһымнаах исписэлиистэри бэлэмнээн таһаарар сыралаах үлэҕит иһин махтанабын.

Бары преподавателлэргэ, устудьуоннарга уонна выпускниктарга чэбдик доруобуйаны, уостубат эрчими, үтүө санааҕыт, толкуйгут туолуутун, үөрэххэ, наукаҕа, уопсастыбаннай олоххо ситиһиилэри уонна саҥа кыайыылары, дьолу уонна этэҥҥэ буолууну баҕарабын!

Айсен Николаев, Саха Өрөспүүбүлүкэтин Ил Дархана

Следите за самым важным и интересным в Telegram-канале и WhatsApp-группе ЯСИА
0
0