14 От ыйа 14.07
  • 31°
  • $ 87,74
  • 95,76

Айсен Николаев: Өрөспүүбүлүкэ сайдыыта улуустартан тутулуктаах

23:34, 20 июня 2018
Текст:
Читайте нас на
Яндекс Новости
ЯДВ

Бүгүн, өрөспүүбүлүкэҕэ олохтоох салайыныы института киллэриллибитэ 15 сылынан тэриллибит мунньахха Ил Дархан э.т. Айсен Николаев өрөспүүбүлүкэ сайдыыта муниципальнай тэрээһиннэртэн (улуустартан) улахан тутулуктааҕын туһунан тоһоҕолоон бэлиэтээтэ.

edersaas.ru.

Мунньахха олохтоох салайыныы института хайдах киллэриллибитин туһунан иһитиннэриилэри Жатай бөһ. баһылыга Анатолий Кистенев уонна ааспыт сылларга олохтоох салайыныы Сэбиэтин салайбыт Владимир Птицын иһитиннэрдилэр. Олохтоох салайыыны уорганнарын инники сайдыыларын туһунан Өлөөн баһылыга Александр Иванов кэпсээтэ.

Түмүк тылы Ил Дархан э.т. Айсен Николаев ылла. Саха өрөспүүбүлүкэтигэр олохтоох салайыныы бигэтик киирбитин, олохтоох салайыныы уорганнара нэһилиэнньэҕэ саамай чугас былаас салаата буолбуттарын, үөскүүр кыһалҕаларын быһаартара дьон олохтоох дьаһалталарга кэлэрин эттэ. Ити курдук, өрөспүүбүлүкэҕэ олох-дьаһах туруга, хаачыстыбата муниципальнай былаас уорганнарыттан улахан тутулуктааҕын бэлиэтээтэ. 

Билигин экономика уонна социальнай эйгэ сайдыыларын, олоҕу-дьаһаҕы тупсарыы туһунар эппиэтинэс эрэгийиэннэргэ сүктэриллэр, оттон ол биллэн турар, муниципальнай тэрээһиннэр сайдыыларын таһымыттан улахан тутулуктаах. Уустук экономическай балаһыанньаҕа, бүддьүөт бары таһымынан кырыымчык кэмигэр үлэлиири-хамсыыры учуоттаан, араас политическай луоһуннарынан саптыбакка, көдьүүһэ суох ороскуоттары аччатыах тустаахпыт. Муниципалитеттар сайдыыларын кыаһылыыр уопсай кыһалҕа биир: ол — үптэн-харчыттан тутулуктаах буолуу улахана итиэннэ ис дохуот үүнүүтүн тэтимэ бытаана буолар. Онон, салалта истиилин уларытар, атын эрэгийиэннэр уопуттарын уонна миэстэҕэ нэһилиэнньэ санаатын үөрэтэр наада. Өссө төгүл тоһоҕолоон бэлиэтиибин: биһиги сүрүн сыалбыт олох хаачыстыбытын тупсарыы буолар, – диэн түмүктээтэ Айсен Сергеевич баһылыктарга туһаайар этиитин. 

Салгыы олохтоох салайыныы департаменын сөргүтэр туһунан ыйаахха бүгүн илии баттаабытын, бу биэдэмистибэ сыалынан муниципальнай тэриллиилэр интэриэстэрин көмүскээһин, кинилэр өрөспүүбүлүкэ сайдыытын быһаарыыга кыттар кыахтаналларын хааччыйыы буоларын бэлиэтээтэ. Хас биирдии муниципальнай тэрээһиҥҥэ сайдыы стратегията баар буолуохтаах, онуоха бастатан туран, дьарыктаах буолуу итиэннэ нэһилиэнньэ дьиҥнээх дохуотун улаатыннарыы чорботуллуохтаах диэтэ.

Раиса Сибирякова, «Саха сирэ» edersaas.ru.

0

0
Следите за самым важным и интересным в Telegram-канале и WhatsApp-группе ЯСИА