Саха сирин 2023 сыллааҕы уонна былааннаах 2024-2025 сыллардааҕы бюджетын боппуруостарын Айсен Николаев «Биир ньыгыл Россия», КПРФ, «Сиэрдээх Россия — Патриоттар — Кырдьык иһин» уонна ЛДПР баартыйалар фракцияларын бэрэстэбиитэллэрин кытта дьүүллэстэ.
«Былаас сүрүн соруга – дойдубут кыайыылаах буоларыгар көмөлөһөр соруктары толорууга болҕомтону ууруу. Анал байыаннай дьаһалы кытта сибээстээх элбэх боппуруос баар, байыаннайдарга уонна кинилэр дьиэ кэргэттэригэр саҥа социальнай төлөбүрдэргэ», — диэтэ Айсен Николаев.
Регион баһылыга бэлиэтээбитинэн, бүгүн бастакы кирбиигэ байыаннай хомуурга ыҥырыллыбыттары экипировканан уонна снаряжениенан хааччыйыы буолар. Оһуобай болҕомто кинилэр дьиэ кэргэттэригэр моральнай уонна материальнай өйөбүл оҥоруу.
Кини көмөнү бары, дохуоттарыттан тутулуга суох, ылыахтаахтарын эттэ. Маны сэргэ кини депутаттар нэһилиэнньэҕэ быһаарар уонна сырдатар үлэни ыыталларыгар болҕомтолорун ууралларыгар туһаайда.
Хаартыска: Андрей Сорокин, СИА
