Ил Дархан э.т. Айсен Николаев бүгүн бырабыыталыстыбаҕа улахан мунньах ыытта. Бүддьүөт ороскуоттаах чааһыгар уларытыыны киллэрии бырабыыталыстыбаттан, Ил Дархан уонна бырабыыталыстыба дьаһалтатыттан саҕаланыахтааҕын эттэ.
“Судаарыстыбаннай бүддьүөт, сымнатан эттэхпинэ, билигин уустук балаһыанньалаах. Бу туһунан эрдэ бырабыыталыстыбаны кытары кэпсэтэн турабын. Бүддьүөт кэмигэр эмтэниллиэхтээҕэ номнуо ааспыт, онон билигин хирургия эрэ көмөтүнэн эмтиир кыахтаахпыт”, — диэн иһитиннэрэр мунньахха Айсен Сергеевич.
Онуоха, бастатан туран, ороскуоту кыччатыы бырабыыталыстыбаттан саҕаланыахтааҕын эттэ. “Бүддьүөт – бу үп секторын эрэ буолбакка бырабыыталыстыба хас биирдии чилиэнигэр барытыгар сыһыаннаах. Хас биирдии министиэристибэ, биэдэмистибэ бэйэҕит ороскуоккутун көрүнүҥ, ол иһигэр судаарыстыбаннай тэрилтэлэргитигэр эмиэ. Кыччатыы-аччатыы барар буоллаҕына, аан бастаан бэйэбититтэн саҕалыахтаахпыт”, — диэн бэлиэтиир кини.
Айсен Николаев бэлиэтииринэн, Ил Дархан уонна бырабыыталыстыба дьаһалтатын үлэһиттэрин ахсаана 7 % кыччыаҕа, бырааһынньыктар, судаарыстыбаннай уонна национальнай суолталаахтартан ураты, ыытыллыахтара суоҕа, ону сэргэ үлэһиттэр командировкаҕа бараллара аҕыйыаҕа. “Бырааһынньыктары, үбүлүөйдэри судаарыстыбаннай уонна муниципальнай бүддьүөт суотугар ыытымаҥ. Командировкалар тустарынан (чуолаан өрөспүүбүлүкэ таһыгар тахсыыны) эттэххэ, биһиэхэ бастайааннай бэрэстэбиитэлистибэлээхпит. Араас форумҥа, тэрээһиҥҥэ миниистирдэр, бырабыыталыстыба бэрэссэдээтэлин солбуйааччылар айанныыллара улахан наадата суох. Уталытыллыбат боппуруоһу быһаарсыы, үбүлээһини кэпсэтии, сирэй көрсөн боппуруоһу илдьиритиһии суох буоллаҕына, миэстэтигэр бастайааннай бэрэстэбиитэлистибэ үлэлиирэ ордук”, — диэн иһитиннэрэр кини.
Аграфена КУЗЬМИНА, “Саха сирэ” хаһыат, edersaas.ru
