Бүгүҥҥү мунньахха РФ бэрэсидьиэнэ Владимир Путин “ыам ыйын ыйаахтарын” толоруу туһунан кэпсэттилэр. Санатан эттэххэ, ааспыт нэдиэлэҕэ Уһук Илин сайдыытын миниистирэ Александр Козлов Дьокуускайга кэлэ сырыттаҕына, бу боппуруоһу сиһилии көрбүттэрэ. Аны бу нэдиэлэҕэ Хабаровскайга от ыйын 6 күнүгэр Уһук Илин регионнарга бу ыйаахтары толоруу туһунан киэҥ кэпсэтии буолуоҕа.
“Миниистири кытары кэпсэтии, онно этиллибит дакылааттар кэннилэриттэн маннык санааҕа кэллим. Биһиги билигин арыый атын хайысхалаах үлэлии олоробут. Үлэлиир ньымабытын уларытыахпытын наада. Сороҕор оҥоруохтаах да дьыалабытын ситэри толорбокко хааларбыт баар суол. Онон “ыам ыйын ыйаахтарын” толорууга сүрүн сыалбытын-сорукпутун туруоран күүскэ үлэлэһиэххэйиҥ. Хас биирдии министиэристибэ, биэдэмистибэ манна туһааннаах миэрэлэри ыларгытыгар көрдөһөбүн”, — диэн этэр Айсен Сергеевич.
Мунньах кэмигэр Экэниэмикэ миниистирин э.т. Майя Данилова демография, култуура эбийиэктэригэр, оскуолаҕа иккис симиэнэни суох оҥоруу, хаарбах дьиэттэн дьону көһөрүү, ыраас уунан хааччыллыы боппуруостарыгар үлэлэһиэххэ наадатын эттэ. “Ыам ыйын ыйаахтарын толорууга биһиги сорох өттүгэр хаалан иһэбит. Арассыыйа орто көрдөрүүтүгэр тиийбэппит. Онно болҕомтобутун ууруохха наада”, — диэн бэлиэтиир Майя Андреевна дакылаатыгар.
Түмүккэ, Айсен Николаев бүддьүөт харчытын көдьүүстээхтик туһаныы барыахтааҕын бэлиэтээтэ. Онуоха бу маны аҥаардас үлэ миэстэтин сарбыйыы эрэ курдук ылынар сыыһатын эттэ. “Оптимизация диэн үлэ миэстэтин кыччатыы буолбатах. Үбү-харчыны көдьүүстээхтик туһаныы барыахтаах. Онуоха үлэ миэстэтин сарбыйан туран, кэмчилээһини ыытар сыыһа. Билигин муниципальнай таһымҥа итинник көстүү тахсаары гынна. Кыра да, улахан да сууманы биһиги төһө кыалларынан көдьүүстээхтик туһаныахтаахпыт. Билигин көрдөххө, биһиги көдьүүһэ суохтук туһана олоробут”, — диэн иһитиннэрдэ кини.
СИА.
