Өрөспүүбүлүкэҕэ оттооһун үлэтэ былаан быһыытынан бара турар, кыстыкка киириигэ ыарахаттар күүтүллүбэттэр. Бу туһунан Ил Дархан Айсен Николаев «Саха» НКИХ ханаалга «Ил Дарханныын кэпсэтии» биэриигэ иһитиннэрдэ, суруйда Саха сирэ саайт.
Кини эппитинэн, быйыл уопсайа 434 тыһыынча туонна от бэлэмнэниэхтээх. Өрөспүүбүлүкэ баһылыга быйылгыттан боломуочуйалар улуустарга бэриллибиттэрин санатта. Ол түмүгэр олохтоох салалталар үлэни тэрийиигэ быһаччы кытталлар, бу үлэ көдьүүһүн көрдөрдө.
«Боломуочуйа улуустарга бэриллибитэ үчүгэй түмүгү биэрэр. Улуус баһылыктара тэрээһиҥҥэ барытыгар кыттыһан, үлэни салайан, сорох улуустар оттооһуҥҥа олус үчүгэйдик киирдилэр. Тыа хаһаайыстыбатыга ыстаап үлэлиир, балаһыанньаны хонтуруоллуубут. Былаантан хаалбакка кыстыкка киириэхпит диэн эрэллээхпин», — диэн Айсен Николаев бэлиэтээтэ.
