Петербургтааҕы экономическай пуорум кэмигэр ЭИСИ уонна Росконгресс пуонда тэрийбит «Клуб губернаторов» мунньаҕар регионнар баһылыктара кытыннылар. Манна 2030 сылга диэри дойду олоҕо-дьаһаҕа хайдах буолуохтааҕын кэпсэттилэр.
Саха Өрөспүүбүлүкэтин баһылыга Айсен Николаев телеграм-ханаалыгар суруйбутунан, кини патриотическай иитии боппуруостара Россия президенин национальнай сыаллар тустарынан ыам ыйынааҕы ыйаахтарыгар ордук туһуланарын туһунан эттэ.
«Биһиги өрөспүүбүлүкэбитигэр бу эйгэҕэ уопут туһунан эттим. Өссө биэс сыллааҕыта Саха сиригэр оскуолаларга Россия өрөгөй ырыатын толорор практика киирбитэ. Билигин бу уопут дойду үрдүнэн биһирэннэ. Ыччат духуобунай-нравственнай иитиитигэр волонтер хамсааһыннара, ытыыга үөрэтэр «Сулус» киин, байыаннай маастарыстыбаҕа уһуйуллар «Воин» киин үлэлэрин кэпсээтим. Патриотизм — маны иитэн-үөрэтэн таһаарыахтаахпыт», — диэн суруллар иһитиннэриигэ.
This post was published on 07.06.2024 10:00 10:00