Донецкай Народнай Өрөспүүбүлүкэҕэ Ил Дархан Айсен Николаев оробуочай сырыытын кэмигэр Докучаевскай куоракка Саха сириттэн, ол иһигэр офтальмологическай клиническай балыыһаттан эмчиттэр биригээдэлэрин кытта көрүстэ.
Саха сирин баһылыга саха офтальмологтара Донецкайдааҕы Народнай Өрөспүүбүлүкэ доруобуйа харыстабылын министиэристибэтин кытта бииргэ үлэлээбиттэрин түмүгэр, бүгүн Докучаевскайга харах катарактата ыарыылаах ыарыһах суоҕун кэриэтин бэлиэтээтэ.
«2024 сылтан манна 900 катарактаны ыраастааһыҥҥа эпэрээссийэ оҥоһулунна. Саха сирин офтальмологтара бырааттыы өрөспүүбүлүкэ сүүһүнэн олохтоохторугар толору хааччыллыылаах олоххо төннөр кыах биэрдилэр», — диэн Айсен Николаев тоһоҕолоон бэлиэтээтэ.
Саха сиринээҕи офтальмологическай клиническай балыыһа кылаабынай бырааһа Иван Луцкан иһитиннэрбитинэн, саха медиктэрэ үлэлиир кэмнэригэр Донецкай Народнай Өрөспүүбүлүкэтигэр тоҕус тыһыынча кэриҥэ эпэрэссийэ оҥоһулунна. Докучаевскайга катарактаҕа эпэрээссийэҕэ уочарат суох буолла, бүгүн куорат олохтоохторо кэтэспэккэ квалификациялаах көмөнү ылаллар.
Саха сирин офтальмологтарын систиэмэлээх үлэтин боппуруоһа ДНР киин куоратыгар –Донецкайга оҥоһулларын бэлиэтээтилэр.
Санатар буоллахха, 2023 сыллаахха Саха сирин баһылыгын сорудаҕынан Донецкай Народнай Өрөспүүбүлүкэтин илин өттүгэр Киров куоратыгар Саха Өрөспүүбүлүкэтин офтальмологическай клиническэй балыыһата Россия медицина тэрилтэлэриттэн бастакынан ДНР-га филиалын арыйбыта.
This post was published on 14.11.2025 10:32 10:32