Реабилитация киинэ 2022 сыллаахха үлэтин саҕалаабыта уонна бааһырбыт, ыалдьыбыт байыаннай сулууспалаахтарга медицина көмөтүн оҥорор. Саха сирэ тэрилтэҕэ хапытаалынай өрөмүөн оҥордо, палааталары модернизациялаата, аныгы медицина тэрилин туруорда.
Ил Дархан байыаннай сулууспалаахтары кытта көрсөн кэпсэттэ, отделениелары көрдө, эмтээһин чааһын билистэ. Медведь позывнойдаах буойун атаҕар ыарахан бааһырыыны ылан баран, быраастар көмөлөрүнэн атаҕа чөл хаалбыт историятыгар болҕомтону уурда. «Бу биһиги быраастарбыт билиилэрин, хорсун быһыылара буоларын дакаастыыр», — диэтэ кини.
Айсен Николаев Мичил диэн ааттаах Горнай улууһун олохтооҕун кытта көрүстэ. Кини билигин реабилитация ааһар, салгыы дойдутугар сылгы баазатын арыйар былааннаах. «Горнайтан сылдьар Мичили үчүгэйдик билэбин. Аа-дьуо бэттэх кэлэн иһэр. Сылгы баазатын тэрийэр былааннаах. Хайаан да көмөлөһүөхпүт», — диэтэ салайааччы.
Захаровтар дьиэ кэргэттэрин көрүстэ — офицер Иван уонна кини кэргэнэ медсестра Анна. Ил Дархан кинилэри дьиҥнээх таптал, эрэллээх буолуу уонна хорсун быһыы символа буолалларын эттэ.
«Хас биирдии маннык көрсүһүү, кэпсэтии — дьиҥнээх герой диэн кимин санатар. Биһиги хас биирдиилэринэн киэн туттабыт! Түргэнник үтүөрэллэригэр баҕарабын! Кыайыы син-биир биһиэнэ буолуоҕа!» — диэтэ Айсен Николаев.
РФ президенигэр Саха сирин бэрэстэбиитэлэ Андрей Федотов бэлиэтээбитинэн, ааспыт сылга санаторий материальнай-техническай баазата тупсарыллыбыт. Салайааччы федеральнай уонна саха медиктарын ардыларыгар тирэхтээх оробуочай сибээс олохтоммутун эттэ.
Сиһилии манна ааҕыҥ.
This post was published on 14.04.2025 10:02 10:02