Горнай улууһугар XXI Манчаары уонна Уус Алдан оройуонугар VIII Саха сирин норуоттарын спортивнай Оонньууларыгар тутуллар социальнай эбийиэктэр былаан быһыытынан үлэҕэ киллэриллиэхтээхтэр. Ол туһунан Айсен Николаев күрэхтэһиилэри бэлэмниир уонна тэрийэр хамыыһыйаны кытта мунньахха эттэ.
2021 сылга Горнай улууһугар спорт национальнай көрүҥнэригэр Манчаары Оонньуулара буолуоҕа. Онно анаан Бэрдьигэстээххэ саҥа спортивнай эбийиэктэр тутуллаллара былааннар — интернаттаах оҕунан ытар комплекс, элбэх функциялаах спортивнай саала, итиэннэ стадиону саҥардыахтара.
2022 сылга, САССР сүүс сааһыгар, Уус Алдан улууһугар Саха сирин норуоттарын стапртакиадалара ыытыллыаҕа. Стадион, чэбдигирдэр-спортивнай элбэх функциялаах комплекс, олорор сирдээх спортивнай единоборство комплекса тутуллуохтаахтар.
Спорт улахан форумнарыгар күүстээхтэри, быһыйдары, сымсалары сөптөөх усулуобуйаҕа көрсөр туһугар инфраструктураны уонна социальнай эбийиэктэри тупсарыыга элбэх үлэ ыытыллыахтаах.
Айсен Николаев эбийиэктэри тутууга хойутааһыны таһаарбат туһугагр эрдэттэн бырайыактыыр-сметалыыр докумуоннары оҥорууну, аукционнары ыытыыга болдьоҕун аһарбат ирдэнэрин эттэ.
«Бириэмэ ыгым. Тутуу былаан быһыытынан ыытыллыахтаах. Хойутааһын таһаарыллыа суохтаах. Бастатан туран, аукционы ыытыыга — болдьоҕу тутуһарга. Этиилэргэ олоҕуран былааны бигэргэтиэххэ, барытын учуоттуохха. Кыһалҕалаах боппуруостары суһаллык быһаарыахха«, — диэн түмүктээтэ Ил Дархан.
This post was published on 08.11.2019 13:22 13:22