Үс мэндиэмэннээх саҥа дьиэ Анаабыр национальнай (долган-эбэҥки) улууһун устуоруйатыгар элбэх кыбартыыралаах бастакы тутуунан уонна олорор дьиэ инфраструктуратын саҥардыыга дьоһун суолталаах түһүмэҕинэн буолла.
Уопсайа 2 тыһыынча кв.миэтэрэ кэриҥэ иэннээх эбийиэги «Конкритстрой» хампаанньа тутта. Кыбартыыралар аныгы ирдэбиллэргэ толору эппиэттииллэр. Сотору кэминэн 31 кыбартыыраҕа барытыгар көһөн киириэхтэрэ.
Айсен Николаев күлүүһү туттарыы үөрүүлээх түгэнигэр дьону хаарбах дьиэттэн көһөрүү үлэтэ судаарыстыба тиһиктээх бэлиитикэтин чэрчитинэн ыытылларын уонна Арктикаҕа олорор дьиэ инфраструктурата салгыы сайдарын бэлиэтээтэ.
“Сотору кэминэн Сааскылаахха өссө икки таас дьиэ туттарыллыаҕа. Бу, төһө да уустук кэмнэр турбуттарын иһин, өрөспүүбүлүкэ уонна дойду сайдарын бигэргэтэр. Биһиги дьон олоҕор табыгастаах усулуобуйаны тэрийэн, иннибит диэки эрэллээхтик хардыылыыбыт”, — диэтэ.
Кини саҥа дьиэ кыбартыыраларын көрөн үлэ хаачыстыбалаахтык оҥоһуллубутун бэлиэтээтэ уонна саҥа дьиэ олохтоохторун кытары кэпсэттэ. Олохтоохтор бу дьиэни олус күүппүттэрин уонна долгутуулаах түгэн тосхойбутуттан үөрбүттэрин туһунан эттилэр.
“Биһиэхэ үс мэндиэмэннээх саҥа таас дьиэни туттулар. Бу биһиги дьиэ кэргэҥҥэ олус үөрүүлээх. Бу күнү олус өр күүппүппүт. Биһиэхэ аныгы, сылаас дьиэ баар буоларыгар күүстэрин уурбут дьоҥҥо барыларыгар ис сүрэхпититтэн махтанабыт. Тутааччылар идэлэрин баһылаабыттарын, эппиэтинэстээхтэрин уонна үтүө суобастаахтык үлэлээбиттэрин иһин ис сүрэхпиттэн махтанабын. Махтал ураты тылларын өрөспүүбүлүкэбит Ил Дархана Айсен Сергеевичкэ хаарбах дьиэттэн көһүү уонна олорор дьиэни тупсарыы боппуруостарыгар болҕомтотун иһин тириэрдэбин”, — диэн Сааскылаах олохтооҕо Юрий Андросов махталын тириэртэ.
This post was published on 26.02.2026 12:13 12:13