Кыргызстан сүүмэрдэммит хамаандатыттан Рио Олимпиадатыгар кыттыбыт саха тустууга Айаал Лазарев социальнай тиһиктэргэ бэйэтин балаһатыгар кини туһугар ыалдьыбыттар, кыайыытыгар эрэммиттэр бырастыы гыналларыгар көрдөстө. Санатар буоллахха кини поляк Роберт Бараҥҥа хотторбута.
Бастакы күөн көрсүүгэ Роберт Бараны 1:0 ахсаанынан хотон испитэ, оттон иккискэ сэрэтии ылбыта, түмүккэ 1:5 ахсаанынан хотторбута.
Финал чиэппэригэр поляк АХШ спортсменыгар Тервел Длагневка кыайтарбыта, инньэ гынан Лазарев «боруонса» да иһин киирсэр кыаҕа суох буолбута.
«Мин Олимпиада туһунан ыра санаа оҥостубутум ыраатта. Оонньууларга элбэх ыарахаттары, эчэйиини ааһан тиийбитим. Саамай наадалаах түгэҥҥэ бэйэм кыаҕым 10% да көрдөрбөтүм. Мин алҕаһым элбэх этэ. Дьоммун, тренербин, норуоппут түһэн биэрдим», —диир тустуук.
This post was published on 22.08.2016 13:29 13:29